Маны аах Уопсастыба

IKEA табаардара Арассыыйаҕа аналог буолан атыыланаллар

Швецияҕа тэриллибит IKEA хампаанньа табаардарын Арассыыйа үгүс олохтооҕо суохтаата. Арассыыйа 11 тэрилтэтэ бу хампаанньа табаарын аналогтарын оҥорон атыылыыр буолла.

Сааҥсыйалар иннилэринэ Арассыыйаҕа атыыланар ИКЕА табаарын оҥоро турбут миэбэл, таҥас, иһит-хомуос тэрилтэлэрэ үлэлэрин саҕалаатылар. Табаардарын «как в IKEA» диэн бэлиэтээн, биллэр интэриниэт-маҕаһыыннарга атыыга таһаардылар.

— Ону баара биһиги дойдубутугар атыыланар ИКЕА табаара манна оҥоһуллар этэ. Хампаанньа дойду түөрт собуотугар инвестициялааҕа. Ол оҥоһуллубут табаар 20 бырыһыана эрэ манна атыыланара, 80 бырыһыана тас дойдуларга барара, — диэн Арассыыйа миэбэлгэ уонна маһынан оҥорууга бырамыысыланнаһын ассоциациятын генеральнай дириэктэрэ Тимур Игнатьев этэр.

Холобурдаан суруйдахха, Воронежка баар «Ангстрем» тэрилтэ ИКЕА аатырбат «Вилма» диэн миэбэл кэллиэксийэтин оҥорор эбит. Бу миэбэл туох баар нуормаҕа эппиэттиир.

Оттон ИКЕА матараастарын Ковров куоракка баар «Аскона» хампаанньа оҥорор этэ. Билиҥҥи балаһыанньанан шведтэр матараастарын куоппуйалыыр сатаммат, онон «Аскона» маныаха майгынныыр Basic уонна Sleep Expert диэн матараастары оҥорор.

Объясняем.рф саайтан.

0
0
Telegram @edersaas20