Маннык ааттаах сэргэх күрэхтэһии өрөспүүбүлүкэ накаастабылы толорор уорганнарын үлэһиттэрин дьиэ кэргэттэригэр сылын аайы ыытыллар.
Бу ааспыт өрөбүлгэ Дьокуускай куорат 16 №-дээх орто оскуолатын спортивнай саалатыгар ыытыллыбыт күрэхтэһиигэ биэс ыал кытынна — 3-с, 5-с, 7-с нүөмэрдээх холуонньалартан, силиэстийэлиир изолятортан уонна хонбуойдааһын отделыттан. Хамаанда үс чилиэниттэн (аҕа, ийэ, оҕо) биирэ холуобунай-исполнительнай систиэмэ үлэһитэ буолар.
Күрэхтэһии түһүмэхтэригэр бэйэни билиһиннэрии, айар нүөмэри толоруу, бастыҥ бүлүүдэни оҥоруу, дьиэ кэргэн туһунан эркин хаһыатын таһаарыы, эстафета уонна Калашников аптамаатын ыһыы-таҥыы киирдилэр.
Уопсай түмүккэ бастакы миэстэни Цырендоржиевтар (СИЗО), иккиһи Соловьевтар (Табаҕа хаайыыта) ыллылар, үһүс миэстэҕэ Шадриннар (хонбуойдааһын отдела) тигистилэр.
Бириистээх миэстэни ылбыттар бары сыаналаах бэлэхтэринэн наҕараадаланнылар, мэтээл уонна грамота туттулар. Оттон бастакы миэстэлээх хамаанда өссө дьиэтигэр кыайыылаах кубогын илдьэ барда.
Маннык тэрээһиннэр ыарахан сулууспаҕа сылдьар үлэһиттэри сүрдээҕин аралдьыталлар, сынньаталлар, сэргэхситэллэр.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.
