Эдэр ийэлэр оҕо көрөн олорон, саҥа дьарыгы көрдүүллэр, дьоҕурдара, талааннара арыллар, сороҕор бу дьарыктарын сайыннаран, биисинэс тэринэллэр. Ол курдук, кинилэр туорт астыыллар, илиинэн ону-маны оҥороллор, кэрэ сэбэрэ солуонун арыйаллар.
Юлия Евсюкова-Калачикова бастакы оҕотун көрөн олорон, 2017 сыллаахха “Инстаграмҥа” “Мамин блокнот” диэн паблигы арыйбыта. Дьиэҕэ олорор ийэлэргэ туһалаах буолаарай диэн санааттан.
Кини Бүлүүттэн төрүттээх, ХИФУ филологическай факультетын “пиарщик-рекламщик” идэлээх бүтэрбитэ. Спорт министиэристибэтин иһинэн физкултуура уонна маассабай спорт управлениетыгар отдел начаалынньыгынан үлэлээбитэ. Билигин иккис оҕотун көрөн олорор.
Вячеслав, Юлия Евсюковтар икки оҕолоохтор: 4 саастаах кыыстаахтар уонна 1 сааһын туолбут уоллаахтар.
— Аан бастаан кыыһым төрөөбүт күнүн ыытаары, оҕо бырааһынньыгын киэргэтээччилэри көрдөөбүтүм. Онтон-мантан көрдөөн, бириэмэм, сырам бөҕө барбыта. Онно барыта биир сиргэ баара буоллар дии санаабытым. Идиэйэ үөскээбитэ, оҕо бырааһынньыгын киэргэтэр, ыытар өҥөлөрү барытын бииргэ мустахха хайдах буолуой диэн.
“Инстаграмҥа” “Мамин блокнот” диэн паблигы арыйан, үлэлэтэн барбытым. Манна ырыссыаптары, оҕолору кытары дьарыктары, дьиэ кэргэн сынньалаҥын, туһалаах сүбэлэри, о.д.а. таһаарабын. Бэйэм эрэ суруйбакка, атыттартан “репост” эмиэ оҥоробун.
Мин бу дьарыкпын үлэм курдук ылыныахпын баҕарбатаҕым. Оннук буоллаҕына, түргэнник хал буолан, сылайан, быраҕан кэбиһиэм диэн. Онон бэйэм интэриэһим, сөбүлүүр дьарыгым курдук илдьэ сылдьабын. Күн аайы суруйуохтаахпын диэн былааннаабаппын, рекламалаан таһаартара сатаабаппын. Сурутааччыларым сөбүлээтэхтэринэ, бэйэлэрэ хос таһаараллар. Ону көрөн, атын дьон кэлэллэр. Бытааннык да буоллар, бигэтик 10-тан тахса тыһыынча сурутааччыланным.
Хас да сыл бииргэ алтыһар сурутааччыларбын билэттиибин, миэхэ виртуальнай доҕоттор курдук буолбуттар. Саҥа дьону кытары билсэр дьиэҕэ олорор киһиэхэ интэриэһинэй. Ыйыттахтарына, барыларыгар хоруйдуу сатыыбын. Биир интэриэстээх буолан, уопсай тылы булабыт. Баҕар, ол иһин буолуо, куһаҕаны суруйар киһи суоҕун кэриэтэ. Илэ көрсүөхпүт, тиэмэлээх көрсүһүүлэри оҥоруохпут диэн былаанныыр этим, ону бу пандемия мэһэйдээтэ.
Бу дьарыгым харчы аҕалар диэн этэр кыаҕым суох, уопсастыбаннай ноҕурууска курдук буолар диэххэ сөбө дуу. Дьоҥҥо, эдэр ийэлэргэ туһаны аҕалабын диэн санааттан астынабын. Миэхэ оннук наада быһыылаах. Урут үлэбэр өрөспүүбүлүкэ таһымнаах маассабай спортивнай тэрээһиннэри тэрийэрбит, ону тэҥэ, идэлээх сойууска үлэлээбитим.
“Дэкириэт – айар үлэ кэмэ”
— Юлия, оҕо көрөн олорон, киһи дьоҕура арыллар дуо?
— Ол чахчы. Дэкириэт – айар үлэ кэмэ. Урут үлэлии сылдьан, куруук бириэмэҥ тиийбэт, төбөҥ атыны толкуйдуу сылдьар буоллаҕа. Оттон билигин үлэттэн “сынньана” сылдьар кэмҥэр: “Тугу гыммыт киһи?” диэн толкуйдуугун.
Мин урут маҕыньыыт планердары оҥорон атыылыыр этим. Ол иннигэр Корея косметикатын, онтон оҕо таҥаһын атыылыы сылдьыбытым. Саҥаны арыйарбын, бэйэбин холонон көрөрбүн сөбүлүүбүн.
Билигин ыччат дьон олоҕу көрүүлэрэ киэҥ, сыаллара-соруктара улахан диэн көрөбүн. Кинилэр быдан аһаҕастар, хааччахха хаайтарбаттар, санаалара күүстээх, дьоҕурдаах буоллахтарына, аан дойдутааҕы былаһааккаларга тахсар кыахтаахтар. Холобур, биир саха уола ыллаан, үҥкүүлээн, iTunes-ка таҕыста. Аан дойдутааҕы таһымнаах былаһааккаҕа мээнэ дьону таһаарбаттар буоллаҕа. Ити курдук харса суох кыттан иһэллэр.
Оҕону иитиигэ төрөппүт оруола
— Дьиэ кэргэҥҥитигэр туох үгэстэрдээххитий?
— Оҕолонноххо, дьиэ кэргэн үгэстэрэ бигэргэнэллэр, бөҕөргүүллэр эбит. Кыыспыт улаатан, ону-маны өйдүүр буолуоҕуттан, бары бииргэ сылдьан, араас бырааһынньыктары тэрийэбит, дьарыктары булабыт. Былырыын Саҥа дьылга дьиэ кэргэнинэн, ыппытын кытары, маскараат буолбуппут. Быйыл эмиэ маскарааттаныахпыт.
Саҥа дьылга бэлэмнэнэрбин, дьиэни киэргэтэрбин сөбүлүүбүн. Ол эрээри, элбэх оонньууру атыыласпыт эрэ киһи диэн буолбатах. Мин санаабар, бэйэ илиитинэн оҥорон, малы-салы иккис тыыннаан биэрбит ордук.
— Дьахтар, эр киһи үлэтэ диэн араараҕыт дуо?
— Биллэн турар, дьиэҕэ олорор киһи, мин элбэхтик сууйар-сотор буоллаҕым. Ол эрээри кэргэним иллэҥ буоллар эрэ, иһит да сууйар, ас да астыыр. Кыыһын кытта бииргэ астыыллар. Ордук кыра оҕолоох эрдэххэ, дьиэ үлэтин барытын ийэҕэ сэлээннээн кэбиһэр сыыһа буоллаҕа. Ийэ ордук ноҕуруускаланара биллэр. Дьиэ үлэтигэр да, оҕону иитиигэ да төрөппүттэр иккиэн тэҥҥэ кыттыһыахтаахтар дии саныыбын. Аҕа оруола улахан.
Эдэр кэргэнниилэргэ кыра кыыһырсыы, иирсээн да баар буоллаҕына, улаатыннарбакка, хомоппокко-хоргуппакка, кэпсэтэн-быһаарсан кэбиһэр ордук. Бэйэ-бэйэҕэ көмөлөһүөххэ, өйөһүөххэ наада.
— Тэҥ саастаах оҕолор күнүүлэһэллэр дуо? Ону хайдах туоратыахха?
— Итинник баар буолар. Кыыс бастаан күнүүлүүр этэ, кэлин ылыммыт, өйдөөбүт курдук. Ол эрээри, син биир болҕомтону көрдүүр. Быраата улаатан, тэҥнэһэн, бииргэ оонньуур буолан эрэллэр.
— Онтон эн санааҕар, хайдаҕа ордугуй: саастарын араастаһыыта улахан буолара дуу, кыра дуу?
— Ити туһунан дьүөгэлэрбин кытары соторутааҕыта кэпсэтэн турабыт. Ханнык баҕарар түгэҥҥэ үчүгэй да, мөкү да өрүттээх. Биллэн турар, улааппыт оҕо быдан өйдүүр, көмөлөһөр буоллаҕа. Ол эрээри, интэриэстэрэ тус-туспа буолан, тэҥҥэ оонньуур кыахтара суох. Икки кыра оҕо олус көрүүлээх, мин сылайар аҕай этим. Ол эрээри, улаатан истэхтэрин аайы, тэҥҥэ оонньууллара, бииргэ улааталлара үчүгэй. Ийэ уйулҕа, доруобуйа өттүнэн бэлэм буоллаҕына эрэ, сыллата оҕолонорго сөбүлэһиэхтээх.
Мин бэйэм соҕотох оҕобун. Кыра сылдьан, эдьиийдээх-убайдаах, балыстаах-бырааттаах оҕолорго ымсыырар этим. Онон оҕолорум биир интэриэстээх, саастыы буолуохтарын баҕарарым. Билигин этэр эрдэ, олох бэйэтэ көрдөрөн иһиэҕэ…
Ангелина Васильева, «Саха сирэ» хаһыат, edersaas.ru
Хаартыска: суруйуу дьоруойун архыыбыттан