Муус устар 14 күнүгэр Перинатальнай кииҥҥэ эдэр ийэлэргэ сөпкө аһааһын, оҕону эмтэрии туһунан дьарык буолла. Түмүгэр, “Ийэ уонна оҕо аһылыгын күннүгэ” диэн кинигэни бэлэх туттулар диэн доруобуйа харыстабылын министиэристибэтэ иһитиннэрэр.
Перинатальнай кииҥҥэ “Ийэ оскуолата” үлэлиир. Ийэ буолуохтаах кыргыттарга дьарыгы эндокринолог-быраас Лена Ахметшина уонна доруобуйа харыстабылын министиэристибэтин Ийэ үүтүнэн аһатыы киинин сэбиэдиссэйэ Айталина Элляева ыыттылар. Ол курдук, сыыһа аһаан, эндокриннай систиэмэ кэһиллиитин, уойуу доруобуйаҕа охсуутун, ийэ үүтэ төһө туһалааҕын, о.д.а. сиһилии кэпсээтилэр.
Бу кинигэ “Арассыыйа ийэлэрэ” уопсастыбаннай хамсааһын Саха сиринээҕи салаатын көҕүлээһининэн бэчээттэммит. Быйыл эбэн-сабан, ис хоһоонун байытан баран, хос бэчээттээбиттэр. Ол эрээри, билиҥҥитэ аҕыйах ахсааннаах.
Кэрэхсэбиллээҕэ диэн, кинигэҕэ мэдиссиинэ уонна наука үлэһиттэрэ кыттыһан үлэлээбиттэр. Ол курдук, олохтоох ааптардары сэргэ, Аһы-үөлү, биотехнологияны чинчийэр федеральнай киин нутрициологияҕа лабораториятын уонна Н.А. Семашко аатынан Национальнай уопсастыбаннай доруобуйа научнай-чинчийэр институтун исписэлиистэрэ кыттыбыттар.
Кинигэни хомуйан таһаарааччылартан биирдэстэрэ, СӨ доруобуйа харыстабылын министиэристибэтин штаты таһынан кылаабынай диетолога, ХИФУ Аһы-үөлү, доруобуйаны чинчийэр научнай киинин салайааччы Ульяна Лебедева этэринэн, өрөспүүбүлүкэҕэ “Доруобай ийэ – доруобай оҕо” бырагыраама үлэлиир. Бу бырагыраама норуот инникитин, үүнэр көлүөнэ доруобай буоларыгар туһулаан үлэлиир.
Бу маннык кинигэ хас биирдии оҕолонон тахсар ийэҕэ тиксэрэ буоллар, оҕо, ийэ, дьиэ кэргэн доруобуйатыгар олус туһалаах буолуох этэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru