Бу күннэргэ Сунтаарга Олоҥхо дьиэтигэр “Ийэ тыл кэрэһитэ – Маппыай Дьөгүөрэп” диэн саҥа кинигэ сүрэхтэниитэ ыытылынна.
edersaas.ru
Матвей Петрович Егоров-Мындыырап Маппыай Сунтаар оройуонун Түбэй Дьаарханыгар олорон ааспыт норуот ырыаһыта, олоҥхоһута, сэһэнньитэ, сэрии кыттыылааҕа этэ.
— Матвей Егоров биһиги аймахха ытыктыыр убайбыт этэ. Сэрии кыттыылааҕын таһынан, олоҥхоһутунан, норуот ырыаһытынан биллэрэ. Ааспыт үйэ 80-с сылларыгар Сунтаар олоҥхоһуттарын испииһэгэр киирбитэ. Матвей Петрович тыа киһитин түбүгүттэн быыс-арыт булан уонна кэлин сааһыран баран сурук үлэтинэн дьарыктанан, Сунтаар улууһун уонна төрөөбүт нэһилиэгин устуоруйатын, аатырбыт улуу убайа С.А.Зверев-Кыыл Уолун олоҕун сорох түһүмэхтэринэн туһунан ахтыылары суруйан хаалларбыта. Убайбыт “Оҕо Муударай бухатыыр” диэн суруйбут айымньыта улахан олоҥхоҕо киирсиэн сөп диэн сыаналыыбын”, — диэн кинигэ ааптара Анетта Егорова санаатын үллэһиннэ.
Кинигэ Дьокуускай куоракка «Дани-Алмас» хампаанньаҕа бэчээттэнэн таҕыста. Матырыйаалларын оҕолоро Варшавянка, Борис, Капиталина Егоровтар ууран-харайан сылдьыбыттарын балтыларыгар Анетта Андреевнаҕа биэрэннэр, барытын саас-сааһынан сааһылаан, ахтыылары, хаартыскалары мунньан, сүүрэн-көтөн кинигэ гынан таһаартарда.
Кинигэҕэ Матвей Петрович Егоров олоҕо сырдатылынна, айымньылара – үҥкүүтүн тыллара, тойуктара, поэмалара, олоҥхото, пьесата, маны тэҥэ, хомуйбут номохторо, үһүйээннэрэ, тус бэйэтин анаарыылара, бэчээттэннилэр. Аҕа дойду Улуу сэриитигэр бойобуой сырыыларын туһунан суруйуулара уонна иһирэх ахтыылара киирбиттэр.
Тэрээһиҥҥэ Маппыай оҕонньор оҕолоро, сиэннэрэ, хос сиэннэрэ, ыҥырыылаах ыалдьыттар кыттыыны ыллылар.
Биһ. корр.. edersaas.ru