Саха сиригэр уонна Арассыыйаҕа Ийэ күнүн чэрчитинэн Дьокуускайга А.Е.Кулаковскай аатынан норуоттар доҕордоһууларын дьиэтигэр «Норуоттар ийэ туһунан ыллыыллар» диэн норуоттар икки ардыларынааҕы бэстибээл сэттис төгүлүн ыытылынна.
Тэрээһиҥҥэ сааһынан хааччахтаммакка ырыа кэлэктииптэрэ, биирдиилээн толорооччулар кытыннылар. Бэстибээл ураты сылаас тыыннанна, истиҥ-иһирэх буолла. Толорооччулар саамай күндү киһилэригэр ананар ырыалары ис сүрэхтэриттэн улаханнык долгуйан, иэйэн-куойан туран ыллаатылар диэн норуоттар доҕордоһууларын дьиэтин пресс-сулууспата иһитиннэрэр.
«Дружба» ансаамбыл кыттыылаахтара Джульетта Айвазян, Айзирек Аттокурова, Аделя Сыдыкова Дьокуускай куорат 10 №-дээх оскуолатын 8 «Г» кылааһын үөрэнээччилэрэ:
—Ийэ хас биирдиибитигэр бу Сир үрдүгэр саамай күндү, чугас киһибит. Ийэбит биһигини күн ахсын туох баар куһаҕантан харыстыыр, үтүө, кэрэ тылынан алгыыр. Ийэ күнэ ураты суолталаах кэрэ бырааһынньык. Бу бэлиэ барыбытын үөрдэр, ис сүрэхпититтэн долгутар, — дэһэллэр.
Бу кыргыттары үөрэтэр кылаас салайааччыта Лариса Георгиевна Софронова:
— Бэстибээл бары кыттыылаахтарыгар дууһаны манньытар, киһини долгутар кэрэ бырааһынньык иһин махтал. Биһиги кылааспытыгар армян, киргиз, нуучча, саха норуотун оҕолоро иллээхтик-эйэлээхтик биир сомоҕо буолан үөрэнэллэр. «Дружба» ансаамбыл бу тэрээһиҥҥэ улахан кыһамньытын, болҕомтотун ууран кытынна. Ийэҕэ анаммыт ырыаны кыргыттар ис сүрэхтэриттэн ыллаатылар, — диэн эттэ.
«Сайсары» ансаамбыл салайааччыта Светлана Степанова бэстибээл ийэҕэ тапталы, ытыктабылы күүһүрдэрин сэргэ, ыллыыр дьон дьоҕурдарын сайыннаралларыгар, элбэх атастаналларыгар-доҕордоноллоругар, бырааттыы норуоттары кытары доҕордоһоллоругар, сомоҕолоһоллоругар төһүү буолар диэн санаалаах.
Тэрээһин үрдүк таһымнаахтык буолан ааста. Дьон-сэргэ наһаа биһирээтэ, сөбүлээтэ. Көрөөччүлэр бэстибээл сылтан-сыл кэҥээн, сайдан, истиҥтэн- истиҥ буолан иһэрин бэлиэтээтилэр. Маныаха үтүө, сырдык эйгэни олохтуур тэрээһиҥҥэ дьиэ кэргэн кэлиитэ элбээбитэ бэлиэтэннэ.
Үөрүүнү бэлэхтиир кэрэ тэрээһин, чахчы да, дьон-сэргэ өйүгэр-санаатыгар, сүрэҕэр-быарыгар өргө диэри иҥэн күүһү-уоҕу, үчүгэйи эрэ сыдьаайа туруоҕа.
Хаартыскаларга Айталина Аргунова түһэриитэ.