Өрөспүүбүлүкэҕэ быйыл ыытыллар Ийэ сылыгар анаммыт логотип бигэргэннэ. Бу анал ойууну конгресс-киин СӨ үлэ, социальнай сайдыы министиэристибэтини кытта оҥордулар.
Саха норуотугар ийэ уобараһа олус күндү, сырдык, сылаас. Ийэ диэн алаһа дьиэни иччилээччи эрэ буолбатах, олоҕу саҕааччы, саҥа киһини тапталынан бүөбэйдээн, иитэн, олох киэҥ аартыгар сирдээччи, бүтүн норуот инникитин түстээччи буолар. Ол да иһин хас биирдии киһиэхэ Ийэ уобараһа күндүттэн күндү буоларын таһынан, уопсастыбаҕа эмиэ сүҥкэн оруоллаах.
Ийэ сылын ойуутун оҥорорго бастыҥ дизайнердар, худуоһунньуктар эрэ буолбакка, историктар, учуонайдар, норуот маастардара эмиэ үлэлэстилэр. Холобур, оһуорун-мандарын оҥорорго элбэх үлэни, кинигэни үөрэттилэр: Борис Неустроев-Мандар Уус “Якутские орнаменты”, Светлана Петрова “Узоры и орнаменты”, “Александр Егоров “Чарующий орнамент”, “Парасковья Макарова “Харысхал ойуулар” кинигэлэрин, о.д.а.
Оттон историческай наука хандьыдаата, фольклор уонна култуура кафедратын доцена Светлана Ивановна Петрова, Таатта улууһун норуот маастара, СӨ уус-уран оҥоһуктарын норуодунай маастара, Мандар Уус үөрэнээччитэ Парасковья Васильевна Макарова, худуоһунньук, педагог, Арассыыйа Худуоһунньуктарын сойууһун чилиэнэ Эдита Геннадьевна Степанова эспирэ быһыытынан үлэлээтилэр.
Ийэ уонна оҕо эскиһин оҥорорго Арктикатааҕы искусство, култуура институтун устудьуоннарыгар күрэс ыыппыттара. Бастыҥ үлэлэри талан, логотипка туһаннылар. Ону тэҥэ, талааннаах дизайнердар, худуоһунньуктар үлэлээтилэр.
Логотип киин өттүгэр оҕотун көтөҕөн, нөрүйэн турар ийэ ойууламмыт. Оҕо ийэтигэр илиитин ууммут. Бу тыһыынчанан ийэлэргэ чугас көстүү, ийэ уонна оҕо быстыбат ситимнэрин, бииргэ буолар дьоллоох түгэннэрин туоһулуур. Дьахтар баттаҕар сардаана сибэкки тыллыбыт, бу – айылҕа кэрэтин, нус-хас олох, сырдык-ыраас сыһыан, кэрэни кэрэхсииртэн үөрүү бэлиэтэ. Кэннилэригэр кириэстиҥи быһыылаах, түөрт өттүттэн харысхал буолар дурда-хахха бэлиэтэ ойууламмыт.
Ийэ уонна оҕо уобарастара үс хаттыгас оһуордаах төгүрүк ии иһигэр бааллар. Бастакы тас хаттыгаска “тараах ойуу” уйгу-быйаҥ, дэлэй буолууну бэлиэтиир. Иккис хаттыгаска “хой муоһа ойуу” саҥа олох үөскээһинин, сайдыыны көрдөрөр, үүнэр көлүөнэни баай-талым, дьоллоох олоххо алгыыр. Үһүс хаттыгаска “илим харах ойуута” эмиэ былыргы харысхал буолар, күрүөлүүр, араҥаччылыыр. Төрдүс ойуу от-мас, үүнээйи умнаһын санатар, киэргэтэр-симиир.
Ийэ сылын логотиба туох баар тэрээһиннэргэ туһаныллар ураты бэлиэ буолуоҕа.
Ангелина Васильева, «Саха сирэ» хаһыат, edersaas.ru
Хаартыска: sakhagov.ru