Маны аах Уопсастыба

Ийэ пааматынньыгар сибэкки дьөрбөтүн уурдулар

Бүгүн, алтынньы 15 күнүгэр, Дьокуускай куоракка СӨ Ийэ күнүн көрсө, үтүө үгэс быһыытынан, ийэ пааматынньыгар сибэкки дьөрбөтүн уурдулар.

Күндү эбэлэри, күн күбэй ийэлэри долгутуулаах бырааһынньыгынан СӨ салалтатын аатыттан  Ил Дархан уонна Бырабыыталыстыба дьаһалтатын салайааччыта Афанасий Владимиров эҕэрдэлээтэ.

«Ийэтэ суох сиргэ олох суох. Ийэ — хас биирдиибитигэр саамай күндү, таптыыр киһибит. Өрөспүүбүлүкэбитигэр бу ураты бырааһынньыгы 29 төгүлүн бэлиэтиибит. Өрөспүүбүлүкэ салалтата уонна Бырабыыталыстыба ийэни, оҕону харыстыырга бары усулуобуйаны тэрийэр. Судаарыстыба ийэҕэ кыһамньыны уурарыгар эрэгийиэҥҥэ нуорума-быраап докумуоннара ылыллыбыттара. Өрөспүүбүлүкэбитигэр Дьоруой ийэлэргэ наҕараадалар олохтоммуттара», — диэтэ Афанасий Семенович.

Афанасий Владимиров үрдүкү салалта, олохтоох дьаһалта, уопсастыбаннай тэрилтэлэр, өрөспүүбүлүкэ кэлэктииптэрин салалталара бу кэрэ-бэлиэ күн ийэлэргэ улахан болҕомтолорун ууралларын эттэ. Бэлиэ күнү көрсө араас күөн күрэстэр ыытыллаллар. Коронавирус дьаҥын бохсор туһуттан тэрээһиннэр куйаар ситиминэн бараллар.

«Саамай сүрүнэ, ийэлэр этэҥҥэ сылдьаллара, чэгиэн буолаллара уонна кинилэргэ кыһамньы уурулларын билэллэрэ наада. Оттон оҕолоро ситиһиилэринэн, үлэлэринэн үөрдэ турдунар», — диэтэ СӨ Ил Дархан уонна Бырабыыталыстыба дьаһалтатын салайар Афанасий Владимиров уонна ийэлэргэ, эбэлэргэ доруобуйаны, дьоллоох олоҕу баҕарда.

Ийэҕэ туруоруллубут өйдөбүнньүк бэлиэҕэ Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова, СӨ Үлэҕэ уонна социальнай сайдыыга миниистирэ Елена Волкова, Дьокуускай куорат дьаһалтатын бастакы солбуйааччы Алексей Корнилов, Дьокуускай куорат Дууматын бэрэссэдээтэлин бастакы солбуйааччы Евдокия Евсикова, «Арассыыйа ийэлэрэ» хамсааһын Саха сиринээҕи салаатын бэрэссэдээтэлэ Прасковья Борисова тыыннаах сибэкки уурдулар.

Өрөспүүбүлүкэҕэ ийэ күнэ СӨ бастакы бэрэсидьиэнэ Михаил Ефимович Николаев көҕүлээһининэн 1993 сыллаахха олохтоммута уонна сыл ахсын алтынньы үһүс өрөбүлүгэр бэлиэтэнэр. Бу күн үгэс быһыытынан, Сайсары күөлүн үрдүгэр турар күн-күбэй ийэҕэ анаммыт пааматынньыкка Аҕа дойду уоттаах сэриитигэр уолаттарын сүтэрбит ытык ийэлэргэ сүгүрүйэллэр.

Хаартыскаҕа Мария Васильева (СИА) түһэриилэрэ.

0
0