«Демография» национальнай бырайыагы олоххо киллэрии чэрчитинэн СӨ дьахталлар уопсастыбаннай тэрилтэлэрин сойууһа оҕо күүтэр ийэлэргэ анаан «Этэҥҥэ ийэ буолуу» бырайыагы олоххо киллэриигэ үлэлэһэр.
Бу кэскиллээх бырагыраама «Ийэ оскуолата» тэрээһинин чэрчитинэн, Дьокуускай куорат Губинскай уокуругар олорор дьахталлар сэбиэттэрэ «Три Д» бибилэтиэкэҕэ ийэ буолаары сылдьар эдэр дьахталлары түмэн, анал үөрэҕин ыытта.
СӨ Дьахталлар уопсастыбаннай тэрилтэлэрин сойууһун бэрэссэдээтэлэ, Арассыыйа дьахталларын сойууһун бюротун чилиэнэ Анжелика Андреева национальнай бырайыак чэрчитинэн ыытыллар үлэ туһунан бу курдук кэпсээтэ:
— «Демография» национальнай бырайыакка үлэлэһии — ийэҕэ уонна оҕоҕо анаммыт өрөспүүбүлүкэтээҕи дьахталлар уопсастыбаннай тэрилтэлэрин сойууһа ыытар араас хайысхалаах үлэтиттэн биирдэстэрэ. Маннык ис хоһоонноох төгүрүк остуоллар, санаа атастаһыылаах көрсүһүүлэр «Үөрэхтээһин», «Доруобуйа харыстабыла» уонна «Култуура» национальнай бырайыактар чэрчилэринэн эмиэ ыытыллаллар.
Губинскай уокурук дьахталларын сэбиэтэ тэрийбит тэрээһинигэр оҕону эмтэрии туһунан анал сэртипикээттээх консультант Екатерина Поскачина, дьахтар төрүүр кэмигэр сөпкө тыыныы оруолун туһунан акушер-гинеколог Александра Егорова, оҕолоно киирэр дьиэҕэ туох туһалаах тээбирини илдьэ киириэххэ сөбүн туһунан кыһыл оҕоҕо аналлаах табаар маҕаһыынын үлэһитэ Светлана Шипкова кэпсээтилэр. Оттон хат дьахталларга аналлаах дьарыктаныылары Ольга Агарина бэйэтэ көрдөрөн, олус туһалаах сүбэлэри биэрдэ. Хат дьахтар аһыырыгар тутуһуохтаах быраабыланы билбэккэ, оҕотун иһигэр улаатыннаран кэбиһэн, эпэрээсийэнэн оҕолоноро чаастатык көстөр. Оттон саҥа төрөөбүт оҕотун эмтэрэр ийэ, анал быраабыланы тутуспакка, сыыһа аһаан, кырачаанын доруобуйатыгар охсууну эмиэ аҕалыан сөп. Бу туһунан педиатр-диетолог Наталья Слепцова олус интэриэһинэйдик кэпсээн, эдэр ийэлэр болҕомтолорун тарта. Оҕо психолога, нейропсихолог Юлия Цыпандина ийэ оҕотун кытта төрүөн инниттэн чугас буолуохтааҕын туһунан эмиэ киһини сэргэхситэр бэсиэдэни ыытта. Эдэр ийэлэр уонна ийэ буолуу үөрүүтүн саҥа билээри сылдьар дьахталлар бу тэрээһинтэн бэрт үгүһү билэн, тэрийээччилэргэ истиҥник махтанан тарҕастылар.
Ити курдук, эдэр ийэлэргэ аналлаах туһалаах тэрээһиннэри ыытан, уопсастыбаннай тэрилтэ «Демография» национальнай бырайыакка олохтоохтук үлэлэһэн, өрөспүүбүлүкэбитигэр доруобай оҕо төрүүрүн ситиһэр соруктаах.
Елена ПОТОЦКАЯ, «Саха сирэ» хаһыат, edersaas.ru
Хаартыска: СӨ дьахталлар уопсастыбаннай тэрилтэлэрин сойууһун архыыбыттан.