Доруобуйа Уопсастыба

Ийэ оскуолата нэдиэлэ ахсын дьарыгы ыытар

Дьиэ кэргэн доруобуйатын киинэ хас сэрэдэ аайы Ийэ оскуолатын дьарыгын ыытар. Манна ийэ буоларга бэлэмнэнэр кэрэ аҥаардары кылбардык төрүүргэ, оҕону эмиий үүтүнэн аһатарга, бэйэ аһын көрүнэргэ, уо.д.а. элбэххэ үөрэтэллэр.

 

Атырдьах ыйын 17 күнүгэр киин диетолог бырааһа Анастасия Саввина дьарыгы ыытта.

Бу нэдиэлэҕэ биһиги оҕотун эмтэрэр ийэ аһылыгын көрдүбүт. Төрүүр дьиэҕэ уонна оҕо кыһыл эрдэҕинэ ийэ аһылыгын көрүнүөхтээх. Саамай сүрүнэ, аһыыр аһа хаачыстыбалаах, натуральнай, иҥэмтиэлээх буолуохтаах. Олохтоох бородууксуйаны болҕомтоҕо ылыахтаах, — диэн быраас кэпсээтэ.

Ханнык бородуукталар буортуну аҕалалларын, 7 күҥҥэ оҥоһуллубут туһалаах меню, түргэнник астыырга сүбэлэри, о.д.а. кэпсэтэн, эдэр ийэлэр лиэксийэттэн астыннылар.

Ийэ оскуолатыгар дьарык нэдиэлэ ахсын ыытыллар. Манна араас исписэлистэр: юристар, социальнай үлэһиттэр, быраастар, диетологтар, уо.д.а. кэлэн кэпсииллэр, ыйытыыларга хоруйдууллар.

Кэлэр нэдиэлэҕэ социальнай көмүскэл управлениетын үлэһитэ кэлэн, араас төлөбүрдэр, босуобуйалар тустарынан кэпсиэҕэ, докумуону хайдах сөпкө толорору сырдатыаҕа. Онон эдэр ийэлэр олус элбэх туһалаах информацияны ылаллар.  Аан бастан ийэ буоларга бэлэмнэнэр кыргыттар билбэттэрэ-көрбөттөрө элбэх буоллаҕа. Ийэ сылынан оскуола үлэтэ өссө кэҥээтэ.

Ийэ оскуолата 202-с түөлбэҕэ, 2-с куорпуска, 417 кэбиниэккэ үлэлиир.

Ангелина Васильева, “Саха сирэ” хаһыат”, edersaas.ru

Хаартыска: sakhagov.ru

0
0
Telegram @edersaas20