Анастасия Борисова режиссердаах «Ийэ» киинэни Clermont-Ferrand 2020 диэн Францияҕа ыытыллар норуоттар икки ардыларынааҕы бэстибээлгэ көрдөрүөхтэрэ диэн «Якутия 24» телеханаал иһитиннэрэр.
Бу туһунан социальнай ситимҥэ киинэ сценариһа Владимир Мункуев иһитиннэрэр. «Ийэ» диэн киинэбит аан дойдуга ыытыллар кылгас кээмэйдээх киинэ бастыҥ куонкуруһугар кыттар буолла. Мин олус үөрдүм«, — диэн Мункуев Twitter-ыгар суруйбут.
Clermont-Ferrand 2020 бэстибээл бырагырааматыгар норуоттар икки ардыларынааҕы, национальнай уонна кылгас кээмэйдээх киинэлэр күрэхтэһиэхтэрэ.
«Тыа сириттэн төрүттээх эдэр дьахтар Москваҕа олохсуйуон баҕарарын туһунан ис хоһоонноох киинэ», — диэн киинэ туһунан кылгас иһитиннэриини бэстибээл саайтыгар суруйбуттар. Киинэҕэ сүрүн оруолу былырыын күн сириттэн күрэммит Галина Тихонова оонньообута.
Бэстибээл Франция Клермон-Ферран куоратыгар тохсунньу 31 күнүттэн олунньу 8 күнүгэр диэри ыытыллыаҕа.
edersaas.ru
Хаартыска «Якутия 24» саайтан.