Ийэ күнүгэр Горнай улууһун Солоҕоннооҕу Култуура уонна Ньурба улууһун Чуукаардааҕы Е.М. Поликарпов аатынан «Эйгэ» норуот айымньытын уонна успуорт кииннэрин үлэһиттэрэ бэрт сонун тэрээһини тэрийдилэр.
edersaas.ru
Омос санаатахха, куйаар ситиминэн икки улууһу холбуох диэтэххэ уустук курдук эрээри, култуура үлэһиттэрэ ырааҕы чугас оҥорон, бэртээхэй бырайыагы олоххо киллэрдилэр. Бу туһунан «Эдэр саас» саайт уопсастыбаннай кэрэспэдьиэнэ Сэргэн Ил Лэкээрин бу курдук кэпсээтэ:
— Бырайыак ааптара Анастасия Васильева куйаар ситиминэн икки улуус нэһилиэктэрин түмэр кулинарнай шоу тэрийдэ.
Бэлиэтээн эттэххэ, сыстыганнаах дьаҥ туран, хааччах олус уустук кэмигэр култуура эйгэтин үлэһиттэрэ аныгы технологияны сатабыллаахтык туһанан, бииртэн биир сонун сүүрээни баһылыыбыт.
Кулинарнай шоуга, кэлин да маннык тэрээһини тэрийиигэ боробуолаан, саҥа саҕалааһыҥҥа култуура үлэһиттэрэ бэйэлэринэн «күөх уоту» уматтылар.
Ол курдук, билиһиннэрииттэн саҕалаан, кууруссаттан астаммыт үс бүлүүдэ көрүҥүн астаан көрдөрдүлэр. Солоҕоннооҕу култуура киинин үлэһиттэрэ кууруссаттан түргэнник буһар рулеты, ананастаах салааты, блиныны, оттон Чуукаардааҕы Е.М.Поликарпов аатынан “Эйгэ” норуот айымньытын киинэ кууруссаттан минньигэс аһыы соуска буспут кляры, ураты тумалаах салааты, аһыы фунчезаны уонна экзотическай фрукталаах салааты астаан билиһиннэрдилэр.
Ас астанар кэмигэр икки нэһилиэктэн айар куттаахтар талааннарын билиһиннэрдилэр. Ырыаны-тойугу өрө тутан, норуот айымньытын уонна успуорт киинин салайааччыта Лариса Федорова, бибилэтиэкэр Клавдия Андреева икки улуус олохтоохторун эҕэрдэлээн, тэрээһиҥҥэ үгүс киһи болҕомтотун тартылар.
Онон Ийэ күнүн чэрчитинэн улуустары сомоҕолуур дьоро киэһэ туһунан Солоҕон уонна Чукаар нэһилиэктэрин олохтоохторо өргө диэри умнуохтара суоҕа.
Елена ПОТОЦКАЯ, «Саха сирэ» хаһыат, edersaas.ru