РФ Үлэҕэ уонна социальнай харысхалга министиэристибэтэ саҥа сокуон барылын бэлэмнээтэ.
Сокуон барылыгар Ийэ хапытаалын харчытын оҕону үөрэтэргэ туһаныыны cудургутутуу уонна олорор усулуобуйаны тупсарарга гражданнар бырааптарын көмүскүүр эбии механизмнары көрүү туһунан этиллэр.
Министиэристибэ оҕону үөрэттэрэргэ Ийэ хапытаалын харчытын Биэнсийэ пуондатыгар тиийбэккэ эрэ ыыттарарга этии киллэрдэ. Билиҥҥитэ үрдүк үөрэх кыһаларыгар үөрэнэргэ эбэтэр эбии дьарыктарга хапытаал харчытын туһанарга быһаарыммыт төрөппүттэр Арассыыйа Биэнсийэҕэ пуондатын уорганнарыгар үөрэххэ төлөбүрдээх өҥө туһунан дуогабары көрдөрөллөр.
Сокуон барыла ылыллар түгэнигэр үөрэх тэрилтэтэ Биэнсийэ пуондатын кытары тустаах сөбүлэһии түһэрсэн, чахчылары (докумуоннары) бэйэтэ Биэнсийэ пуондатыгар биэриэхтээх. Оччотугар төрөппүттэр дуогабар төлөбүрүгэр харчыны онлайн-эрэсииминэн ыыталларыгар кыах баар буолуоҕа.
Онуоха Ийэ хапытаалын туһаныы сүрүн хайысхата – олорор дьиэ усулуобуйатын тупсарыы.
Өссө биир көҕүлээһин микрофинансовай кооперациялартан ылбыт сойуомнарын төлөөрү Ийэ хапытаалын харчытын туһаналларыгар гражданнар бырааптарын көмүскүүргэ эбии механизмнарга хайысхаланар.
Ийэ хапытаалын харчытын Киин баан эрэллээх кооперацияларын испииһэгэр киирбит потребительскай уонна тыа хаһаайыстыбатын кооперативтарын эрэ кытары хардарыта дьайсыыга ыытыахха сөп буолуоҕа.
Ол эбэтэр, Ийэ хапытаалын харчытын, урукку курдук, кооперативтары кытары сыһыаннаһыыга туһаныахха сөп (ол гынан баран, Киин баан бигэргэппит испииһэгэр киллэриллибиттэри эрэ кытары). Бу гражданнары эрэлэ суох, биир күннээх кооперативтары кытары сөбүлэһии түһэрсэртэн көмүскүөҕэ.
Надежда ЕГОРОВА, «Саха сирэ», edersaas.ru