Ахсынньы 25 күнүгэр, Дьокуускайга, 8000-с ахсааннаах Ийэ хапытаалын сертификатын үөрүүлээх-быһыыга-майгыга туттардылар.
Бу бэлиэ сертификаты Прокопьевтар дьиэ кэргэттэрэ туттулар. Кинилэргэ быйыл ыам ыйыгар үһүс оҕолоро Арина төрөөбүт. Акулина Николаевна Техническэй лицейгэ нуучча тылын учууталынан, Ариан Васильевич ХИФУ-га үлэлииллэр.
Сайабылыанньаларын “Мин докумуоннарым” Элбэх өҥөнү оҥорор киин саайтын нөҥүө биэрбиттэр. Өрөспүүбүлүкэтээҕи Ийэ хапытаалын олорор усулуобуйаларын тупсарыыга ыытыахтарын баҕараллар.
Өрөспүүбүлүкэтээҕи Ийэ хапытаала 2011 сылтан үс уонна онтон элбэх оҕолоох ыалларга бэриллэр буолбута. Бу ааспыт 8 сыл иһигэр Саха сиригэр барыта 27251 сертификат бэриллибит. Ол онтон 24361 ыалга 2,6 млрд. солк. суумалаах төлөбүр оҥоһуллубут.
Ийэ хапытаалын суумата сыл аайы кыралаан үрдүүр. Билигин хапытаал суумата – 139 716 солк. 68 харчы. Өскөтүн элбэх оҕолоохторго бэриллэр сир учаастактарыттан аккаастаннахтарына, хапытаал суумата икки төгүл үрдүүр. Ол эрээри, учаастактан аккаастаныы болдьоҕо бүтэрэ аҕыйах хонук хаалла, бу сыл ахсынньытынан бүтэр.
Ангелина ВАСИЛЬЕВА, “Саха сирэ” хаһыат, edersaas.ru