РФ үлэҕэ, социальнай сайдыыга министиэристибэтэ Ийэ хапытаалын бырагырааматын 2024 сылга диэри уһатар туһунан этиини бырабыыталыстыбаҕа киллэрдэ. Ол онтон сиэттэрэн, хас да сыллаах үлэ торумун оҥорбуттар.
Билигин федеральнай Ийэ хапытаалын олорор дьиэни-уоту тупсарыыга, ийэ биэнсийэтигэр, оҕону үөрэттэриигэ уонна инбэлиит оҕону эмтэтиигэ туһаныахха сөп.
Министиэристибэ үлэһиттэрэ хапытаал төһө көдьүүстээҕин ырытан көрүөхтэрэ уонна уларытыылары киллэриэхтэрин сөп.
Санатар буоллахха, Ийэ хапытаала Арассыыйаҕа 2007 сылтан үлэлиир. Бу уонтан тахса сыл устата Ийэ хапытаала чахчы көдьүүстээҕин көрдөрдө. Дойду үрдүнэн 8 мөлүйүөнтэн тахса дьиэ кэргэн сертификаты ылбыта, кинилэртэн 56 %-нара Ийэ хапытаалын үбүн-харчытын туһаннылар. Онон 5 мөлүйүөн дьиэ кэргэн ипотеканы толору эбэтэр сорҕотун төлөөн бүтэрдилэр. Оттон Саха сиригэр 80 тыһыынчаттан тахса ыал хапытаалы ылбыта.
Инфляцияттан көрөн, Ийэ хапытаалын суумата сыл аайы улаатан испитэ. 250 тыһ. солкуобайтан саҕалаан, 2018 сылга 500 тыһ. солк. тиийиэхтээх диэн этэ да, кириисис буолбутунан, Ийэ хапытаала 2016 сылтан үрдүү илик. Ол да буоллар, уон сыл иһигэр 81% үрдээбитин бэлиэтиир тоҕоостоох. Билигин суумата 453 тыһ. солк. тэҥнэһэр.
Аан бастакыттан Ийэ хапытаалын болдьоҕо 2017 сылга диэри диэн этэ. Ол эрээри бастаан 2019, онтон 2022 сылга диэри уһаппыттара.
Ангелина Васильева, “Саха сирэ” хаһыат, edersaas.ru