Айсен Николаев өрөспүүбүлүкэ Ил Дарханынан талыллыбыта биир сылын туолла.
Кини биир сыл иһигэр өрөспүүбүлүкэ улуустарыгар элбэхтик сылдьан, нэһилиэнньэни кытары көрүстэ, тыын суолталаах боппуруостары федеральнай таһымҥа быһаарыста.
Ил Дархан ыытар бэлиитикэтин туһунан дьон-сэргэ санаатын “Саха сирэ” хаһыакка үллэһиннэ.
edersaas.ru
Светлана Иванова, Сунтаар улууһун Киин балыыһатын кылаабынай бырааһа:
– Ил Дархаммыт Айсен Николаев дуоһунаһыгар киирээт, Саха сирин олохтоохторо олохторо-дьаһахтара тупсарыгар, доруобуйалара бөҕөргүүрүгэр, уһун үйэлэнэллэригэр туһалаах ыйаахтары, уураахтары таһааран, олоххо киллэрэн барбытын биһириибин.
Быйыл биһиги улууспутугар Доруобуйа уонна экология сыла биллэриллибитэ. Ил Дархаммыт бырамыысыланнас хампаанньаларын үлэлэрин тупсарыы уонна өрөспүүбүлүкэ бүддьүөтүгэр балысхан үп киирэрэ ситиһиллиэхтээҕин тоһоҕолуур.
Доруобуйа харыстабылыгар бүддьүөт ороскуотун индексэ (ИБР) улаатыахтаах. Ол түмүгэр элбэх үп федеральнай бүддьүөттэн кэлиэхтээх. Оччотугар биэлсэр-акушер пууннарын, быраас амбулаторияларын тутууга уонна өрөмүөннээһиҥҥэ анал бырагыраамалар көрүллүөхтээхтэр. Киһи доруобуйатын бэйэтэ көрүнүөхтээх, эрдэттэн харыстаныахтаах, сэрэтэр дьаһаллары ылыахтаах диэн, өрөспүүбүлүкэҕэ биллэриллибит “Онкопоиск” аахсыйа ыытыллан, дьон-сэргэ махталын ылла.
Айти-технология сайдан, үгүс ыччат үлэлээх буолла, сайдыылаах ыччат элбииригэр олук буолуоҕа. Үһүс уонна онтон элбэх оҕо төрөөтөҕүнэ, көрүллэр Ийэ эрэгийиэннээҕи хапытаала демография сайдыытыгар быһаччы оруоллаах.
Надежда ЕГОРОВА, “Саха сирэ”, edersaas.ru