Уһук Илин олохтоохторо иккис оҕолоругар ылар Ийэ хапытаалыгар 30% эбии төлөбүр ылар буоллулар. Кулун тутар 18 күнүгэр бырабыыталыстыба Уһук Илиҥҥэ төрөөһүнү элбэтэр миэрэлэри өйөөтө. Бу туһунан РФ үлэҕэ, социальнай сайдыыга миниистирэ Максим Топилин иһитиннэрдэ.
Ол эбэтэр, дьиэ кэргэҥҥэ иккис оҕо төрөөтөҕүнэ, федеральнай Ийэ хапытаалын ылаллар. Суумата – 455 тыһ. солк. Манна эбии 135 тыһыынча эбиллэр буолла. Оччотугар Ийэ хапытаалын суумата 590 тыһ. солк. тиийэ үрдээн биэрэр. Бу иннинэ, олунньуга Ил Дархан Айсен Николаев маннык ис хоһоонноох ыйаахха илии баттаабыта, ол эбэтэр кини урутаабыт буолан тахсар.
Бу миэрэ 2019 сыл тохсунньу 1 күнүттэн төрөөбүт оҕолорго ананар. Ийэ хапытаалыгар эбии төлөбүр тохсунньуга, олунньуга төрөөбүт оҕолорго билиҥҥиттэн тута ааҕыллар.
Маны таһынан, быйылгыттан ыла бастакы, үһүс уонна онтон кэлэр оҕолорго эмиэ эбии төлөбүрдэр бааллар.
Топилин иһитиннэрбитинэн, эбии миэрэлэргэ анаан барыта 3,1 млрд. солк. ирдэнэр. Ол РФ бырабыыталыстыбатын хаһаас (резервнэй) пуондатыттан бэриллиэҕэ.
Уһук Илиҥҥэ төрөөһүнү элбэтэр туһунан миэрэлэри ылынар туһунан Владимир Путин балаҕан ыйыгар Владивостокка буолбут мунньахха эппитэ.
Ангелина ВАСИЛЬЕВА, “Саха сирэ” хаһыат, edersaas.ru