Идэлээх сойуустар федерацияларын бэрэссэдээтэлин солбуйааччы, өрөспүүбүлүкэ Общественнай палататын бэрэссэдээтэлин солбуйааччы Валентина Ивановна Кириллина дойду баһылыгын талар быыбар хас биирдии гражданиҥҥа дьоһун, улахан суолталаах буоларын бэлиэтиир.
—Бүгүн хас биирдии гражданиҥҥа дойду баһылыгын талар үрдүк эппиэтинэстээх күн. Бу бука барыбыт олохпутугар улахан, дьоһун суолталаах событиенан буолар. Бүгүн бары куоластааһыҥҥа дойдубут инникитин, кэнчээри ыччаппыт кэскилин туһугар турунан туран быыбарга көхтөөхтүк кыттыаҕыҥ. Хас биирдии гражданин бу суолталаах күн бэйэтин тус санаатынан, ис сүрэҕинэн салайтаран, уһуну-киэҥи толкуйдаан, ырааҕы ырыҥалаан көрөн туран куоластыаҕа. Маныаха биһиги өрөспүүбүлүкэбитигэр быыбарга кыттыы бырыһыана улахан буолуоҕа диэн эрэнэбин.
Сомоҕолоһуулаах буолуоҕуҥ итиэннэ чахчы дойдутун, норуотун туһугар кыһамньытын уурар, үрдүк эппиэтинэстээх, олох таһымын тупсарарга, сайыннарарга сүрүн боппуруостары быһаарар, олоххо киллэрэр, сыалы-соругу толорон тэйэр кандитакка куоласпытын биэриэҕиҥ. Ийэ дойдубут туһугар үрдүк эппиэтинэстээх буолуоҕуҥ.
Сардаана БАСНАЕВА, «Саха сирэ» хаһыат, edersaas.ru