Тойбохойдооҕу оҕо дьиэтин иитээччитэ Екатерина Тихонова үбүлүөйүгэр үөрэппит оҕолоро нуорка саҕынньаҕы, бэргэһэни уонна Москваҕа сакаастаммыт туорду бэлэхтээтилэр. Бу туһунан сонун социальнай ситимнэргэ тарҕанна.
edersaas.ru
Екатерина Филипповна 50 сааһын туолар үбүлүөйүн бэлиэтээтэ. Кини оҕо дьиэтигэр 2002 сылтан үлэлиир. Оҕолору кытары биир тылы булар, эппиэтинэстээх, ийэлии амарах, эйэҕэс педагог буолан, иитиллээччилэрэ олус сөбүлүүллэр. Оҕо дьиэтин 2010-2011 сылларга бүтэрбит выпускниктар бары түмсэн, киниэхэ бэлэх оҥорорго эрдэттэн сүбэлэспиттэр. Сүүрбэччэ буолан кыттыһан, эрдэттэн харчы хомуйан бэлэмнэммиттэр. Иитээччилэрэ нуорка саҕынньахха баҕарарын билэр буолан, чопчу тугу бэлэхтииллэрин быһаарбыттар.
Кинилэри Екатерина Филипповна 8-9 сылы быһа ииппит-үөрэппит, такайбыт буолан, иккис ийэлэрин кэриэтэ ылыналлар эбит. Оҕо дьиэтиттэн баран, үөрэхтэнэн, үлэһит буолан баран, ыраах улуустарга да олорон бэйэ-бэйэлэрин кытары ыкса билсэллэр, сибээстэһэллэр, доҕордоһоллор. Улааппыт дьиэлэригэр, иитээччилэригэр кэлэ тураллар. Дьиктитэ диэн, үксүлэрэ учуутал, иитээччи идэтин талбыттар.
Сэтинньи 22 күнүгэр Тойбохойго 8 буолан тиийбиттэр, үбүлүөйү ыытарга көмөлөспүттэр. Екатерина Филипповнаҕа бу соһуччу үөрүү буолбут, бэлэх туһунан тугу да билбэт эбит.
Дьэ, ити курдук, бу маннык сонуннартан киһи үөрүөх эрэ тустаах – тулаайах оҕолор үлэһит буолан, атахтарыгар туран баран, иккис ийэлэрин кэриэтэ саныыр иитээччилэригэр истиҥ махталлара, киһилии сыһыаннара үгүс дьону долгутта, уйадытта.
Ангелина Васильева, “Саха сирэ” хаһыат, edersaas.ru