Өрөспүүбүлүкэтээҕи суһал ыстаап салайааччытын солбуйааччы Ольга Балабкина тохсунньу 20 күнүнээҕи брифиҥҥэ оҕолор дьиэҕэ олорон үөрэнэр кэмнэригэр атын сиргэ сылдьыбаттарын хонтуруоллуурга ыҥырда.
Суукка иһигэр 7 оҕо “ковидынан” ыалдьан, балыыһаҕа киирбит. Билигин оҕолор дьиэлэригэр олорон, тэйиччиттэн үөрэнэллэр (9-с, 11-с кылаастартан уратылар). Ил Дархан 2271 №-дээх ыйааҕынан, бу кэмҥэ оҕолор сынньатар-аралдьытар, атыы-эргиэн кииннэригэр сылдьаллара бобуллар.
Уһуйааннар үлэлии тураллар, ол эрээри, үрдүк бэлэмнээх эрэсиимҥэ киирбиттэрэ. Иитээччилэр сарсыарда аайы суһал түмүктээх анаалыһы туттаран, түмүгүн билэн эрэ баран, оҕолор бөлөхтөрүгэр киирэллэр. Оҕо кыра да тумуулаабыт сибикилээх буоллаҕына, уһуйааҥҥа кэлиэ суохтаах. Төрөппүттэргэ өйдөтөр-сэрэтэр үлэ ыытыллар. Оҕолор кыраадыстарын күҥҥэ иккитэ кээмэйдииллэр, дьиэни сууйаллар-сотоллор.
Элбэх киһи ыалдьыбытын үрдүнэн, үгүстэр чэпчэкитик аһараллар, дьиэлэригэр олорон эмтэнэллэр. Ыйаах чэрчитинэн, тумуулаабыт, эбэтэр “ковидтаах” дьоннуун хантаактаспыт дьон бэйэни хааччахтанан олоруулара 14 күнтэн 7 күҥҥэ диэри кылгаабыта.
Ольга Балабкина тэрилтэлэр үлэһиттэрин 50%-ра тэйиччиттэн олорон үлэлииллэрин хааччыйарга ыҥырда. Маннык ньыма сүрүн үлэһиттэр ыарыйдахтарына, солбуйсан биэрэллэригэр туһуланар.
Олус сыстыганнаах вирус кэлбитинэн, бу күннэргэ төһө кыалларынан, элбэх киһилээх сирдэргэ сылдьыбаккытыгар, харыстанар миэрэлэри күүһүрдэргитигэр ыҥырабыт.
Ангелина Васильева, “Саха сирэ” хаһыат, edersaas.ru