Бүтүн Арассыыйатааҕы хайыһар күнүгэр сөп түбэһиннэрэн, Ньурба улууһун уһуйааннарын салайааччылара уонна үөрэх салалтатын оскуолаҕа киириэн иннинээҕи саастаах оҕолору иитии-үөрэтии салаатын исписэлиистэрэ Ньурба-Дьиикимдэ хайысханан хайыһарынан айаҥҥа сырыттылар, чөл олоҕу бэйэлэрин холобурдарынан көҕүлээтилэр.
Айан сыалын-соругун быһыытынан Дьиикимдэ уһуйаанын саҥа дьиэтин көрүү, Доруобуйа, Үөрэҕирии сылынан чэбдигирдэр тэрээһиҥҥэ кыттыы буолла. Дьиикимдэ оскуола-саадын дириэктэрэ А.К. Лаптев, сүрүннүүр иитээччи О.А. Егорова бэрт ситимнээхтик тэринэн, анаан хайыһар суолун астаран, олус үчүгэйдик көрүстүлэр.
— Хайыһар кэппиппит ырааппыт дьон быһыытынан, «Ромашка» оҕону сайыннарар киин сэбиэдиссэйэ Егор Кириллович Егоров быһаарыытын, сүбэтин болҕойон истэн, дьэ, хайыһарбытын кэтэн, суолга субуруһа хааман истибит. Кыһаллан-мүһэллэн, хайыһарбытын син салайыахча буолан иһэн, халтарыйа сырылаан, хас да киһибит хаарга хоруйа, өттүктүү түстүбүт… Ол да буоллар, кэлбит сыалбытын толорон, Дьиикимдэ эбэни бэркэ эргийэн, сибиэһэй салгынтан, чаҕыл күнтэн иэдэспит кытаран, көхтөөх күлсүүттэн дуоһуйуу ыллыбыт.
Салгыы оҕо саадыгар арыылаах алаадьынан, итии чэйинэн айах тутан көрүстүлэр. Түөрт хамаандаҕа хайдан, квест оонньууга кытынныбыт. Сорудахтар барыта чөл олох сиэригэр анаммыт буоланнар, хайыһардаабыт омун санаабытыгар тэптэрэн, начаас үлүгэр толортуу охсон, хоппут хамаанда кубок тутта. ыһарДьэ, онтон саҥа дьиэни хас муннугун, киэргэлин, тэрилин кэрийэ сылдьан, сыныйан көрдүбүт-иһиттибит. Дьиикимдэ оҕо саадын аҕыйах ахсааннаах кэллэктиибэ киһи эрэ сөҕө-махтайа көрөр маанылаан тардыбыт сандалыларын тула олорон, бэркэ сэлэһэн, уопут атастаһан тарҕастыбыт, — диэн Күндээдэтээҕи «Кэнчээри» оҕо саадын сэбиэдиссэйэ Венера Степанова санаатын үллэстэр.
Ангелина Васильева, “Саха сирэ” хаһыат, edersaas.ru
Хаартыска: В.И. Степанова.