III СПАРТАКИАДА: 1971 сыл, бэс ыйын 23-25 күннэрэ. Дьокуускай куорат
Бэс ыйын 23 күнүгэр Дьокуускайга «Спартак» стадион үрдүнэн Манчаары Баһылай бирииһигэр III спартакиада былааҕа көтөҕүллүбүтэ. Спартакиада Саха сиригэр хомсомуол тэриллибитэ 50 сылыгар ананан ыытыллыбыта.
Урукку спартакиадаттан уратытынан хапсаҕайга эдэр уолаттар бөлөхтөрө киллэриллибэтэҕэ буолар. Ол оннугар 35 диэри, 35-40, 40-45 уонна онтон үөһээ саастаахтар күрэхтэспиттэрэ. Чэпчэки атлетикаҕа – сүүрүүгэ эмиэ ити бөлөхтөргө тус-туһунан дистанциялар киллэриллибиттэрэ.
Киэһэ 7 чаастан оркестр ньиргиэрдээх доҕуһуолунан оройуоннар спортсменнарын колонналара парааттаан долгуспуттара, түрүбүүнэлэр устун эҕэрдэлэр, дохсун ытыс таһыныыта дуорайбыта. Стадиоҥҥа аан бастаан «Урожай» уопсастыба былааҕын өрө туппутунан Чурапчы эдэр, кэскиллээх тустууга Юрий Андреев киирбитэ. Кини кэнниттэн уопсастыба знамятын биһиги чулуу спортсменнарбыт Петр Алексеев, аатырбыт сүүрүк, оҕунан ытыыга күрэхтэһэ кэлбит Татьяна Черноградская, бэтэрээн сүүрүк, марафонец Степан Кириллин, оҕунан ытааччы эдэркээн кыыс Раиса Колодезникова күөрэччи тутан киллэрбиттэрэ. Онтон параады баһылаан-көһүлээн икки бастакы спартакиада кыайыылааҕа, Yөһээ Бүлүү дэлэгээссийэтэ киирбитэ. Параады хамаандалааччы, спартакиада кылаабынай судьуйата Валерий Кочнев спортсменнар спартакиада аһыллыытыгар бэлэмнэрин туһунан «Урожай» уопсастыба бэрэссэдээтэлигэр Афанасий Алексеевка арааппардаабыта.
БАСТАКЫ КҮН ТҮМҮКТЭРЭ
Үөһээ Бүлүү маастара Ф.Федотов Өлүөхүмэ ыччатын Е.Винокуровы 8 эрэ сөкүүндэнэн сири булларбыта. Ааспыт спартакиадаҕа иккис миэстэлэммит Семен Морфунов (Чурапчы) албас оҥоробун диэн Аллайыахаттан кэлбит К.Стручковка кыайтаран, салгыы тустартан маппыта. Ол оннугар бииргэ төрөөбүт быраата Иннокентий 53 кг ыйааһыннаахтарга кыайыыны ситиспитэ.
Спартакиаданы аһыы параадын кэнниттэн тута сүүрүктэр 10 000 м күрэхтэһиилэрэ саҕалаабыттара. Уус Алдан спортсмена Владимир Слепцов уонна Үөһээ Бүлүү биллиилээх быһыйа Кирилл Никифоров икки ардыларыгар улахан эрийсии буолбута. Слепцов биэтэккэ 32 мүнүүтэ 22 сөкүүндэнэн кэлэн, пьедестал үрдүкү кэрдииһигэр тахсыбыта, чөмпүйүөн лиэнтэтин иилиммитэ. Никифоров иккис, Афанасий Илларионов үhүc миэстэ буолбуттара.
Спартакиада маҥнайгы күнүгэр буолбут күрэхтэһииттэн биир саамай кэтэһиилээхтэрэ – кылыы буолбута. Манна рекордсмен Николай Санников кыттара дьону интэриэһиргэтэрэ. Финалга тахсар иһин 33 киһи кылыйбыта. Саамай чулуулара, 6 киһи финалга ыстанар быраабы ылбыттара: Василий Посельскай, Афанасий Аммосов, Виктор Мельчинов, Петр Посельскай, Степан Спиридонов уонна Николай Санников. Рекорд хаһаайынын финальнай ыстаныылара табыллыбатахтара. Онон кини күнүскү көрдөрүүтүнэн, 44 м 20 см түһэн чөмпүйүөн буолар.
Иккис үчүгэй түмүгү «личнигинэн» кыттыбыт «Спартак» уопсастыба чилиэнэ, университет устудьуона А.Аммосов 42 м 85 см түһэн ситиспитэ. Салгыы үчүгэй түмүгү П. Посельскай (Чурапчы) 41 м 79 см, В. Посельскай (университет) көрдөрбүттэрэ. Уолаттарга Владимир Готовцев (Уус Алдан) 41 м 12 см ыстанан чөмпүйүөннүүр, И.Гурьев (Чурапчы) үhүc миэстэлэнэр.
35 саастаахтарга Анатолий Тобохов 36 м 67 см кылыйан бастаабыта.
40-45 саастаахтарга Иван Захаров (Чурапчы) 33 м 45 см, 45-тэн үөһээ саастаахтарга Ленинскэй оройуон хаһыатын үлэһитэ, 48 саастаах Василий Васильев атыттары атахтаах оҥортооботоҕо – 32 м 35 см түстэ. Кини өссө 1946 сыллаахха 39 м 70 см кылыйан өрөспүүбүлүкэҕэ бастыҥ көрдөрүүнү түһэн турардаах – Петр Гуляев рекордун аһарбыт эбит. Сааһырбыт дьон успуордунан уһуннук дьарыктаныахтарын сөптөөҕүн чаҕылхай туоһутунан Үөһээ Бүлүүттэн сылдьар биэнсийэлээх, 66 саастаах Максим Ксенофонтович Халлаанап кыттыыта буолбута.
ЫСТАҤА
20 эдэр уол кыттыбытыттан Уус Алдан уола Владимир Готовцев 39 м 17 см ыстаҥалаан, бастаабыта. Иккис түмүгү Юрий Клюцев (Өлүөхүмэ) көрдөрбүтэ – 36 м 63 см, үhүc В.Керемясов (Чурапчы) буолбута.
18-35 саастаахтарга Н.Санников эмиэ кыайыылаах тахсыбыта – 42 м 88 см. А.Аммосов, П.Посельскай бириистээх миэстэлэргэ тахсыбыттара. 35-40 саастаахтар бөлөхтөрүгэр 12 киһиттэн учуутал А.Тобохов (Бүлүү) 34 м 65 см ыстаҥалаан, Уус Алдан учууталын Афанасий Максимовы кыайбыта. 40-45 саастаахтарга И.Захаров (Чурапчы), саамай aҕa саастаахтарга В.Васильев (Ленинскэй) эмиэ бастаабыттара. Көрдөрүүлэрэ даҕаны куһаҕана суох, туһааннааҕынан 32 м 43 см уонна 30 м 80 см. Yhүc күҥҥэ бүтэһик көрүҥ — куобах саҕаламмыта. Бу да сырыыга Николай Санников иннин ылар киһи суох буолбута. Кини 36 м 24 см баран, Манчаары спартакиадатын абсолютнай чөмпүйүөнүн аатын ылбыта. Уолаттарга Чурапчы интэринээт-оскуолатын үөрэнээччитэ Иван Гурьев 34 м 09 см баран бастаабыта.
35 саастаахтарга Ленинскэй оройуон спортсмена А.Никифоров 30 м 52 см ыстанан чөмпүйүөннээбитэ. 40 саастаах бэтэрээннэргэ эмиэ уларыйыы тахсыбыта. Кылыыга уонна ыстаҥаҕа иккис буолуталаабыт Нам аатырбыт кылыыһыта Иннокентий Суздалов 30 м 70 см түһэн, иккистээбит Иван Захаровы 2 м 31 см куоһарбыта. 45-тэн үөһэ саастаахтарга бу да сырыыга В.Васильев чөмпүйүөннүүр — 26 м 10 см түһэр уонна спартакиада абсолютнай чөмпүйүөнүн үрдүк аатын сүгэр. Манна Максим Халлаанап 24 м 66 см түһүүтэ саастаах киһиэхэ олус үчүгэй көрдөрүү буоларын бэлиэтиир тоҕоостоох.
СҮҮРҮҮ
Араас кэмҥэ өрөспүүбүлүкэҕэ аатыран сүүрэ сылдьыбыт сааһырбыт сүүрүктэр үс дистанцияҕа күрэхтэһиилэрэ олус интэриэһинэй буолла. 35-гэр диэри саастаахтарга өрөспүүбүлүкэ урукку чөмпүйүөннэрэ Василий Нестерев (Бүлүү) уонна Василий Попов 3000 м эрийсиилэрэ дьон болҕомтотун тардыбыта. Нестерев олус чэпчэкитик сүүрэн утарылаһааччытын лаппа куоппута. 40 саастаахтарга аатырбыт марафонец Андрей Устинов 1 500 м сири 4 мүнүүтэ 39,8 сөкүүндэнэн кэлэн, утарылаһааччыларын ырааҕынан кыайталаабыта. Иккиһи И.Дьячковскай (Чурапчы), үcүhү И.Иванов (Үөһээ Бүлүү) ылбыттара.
45 саастаах сүүрүктэргэ уруккута дэгиттэр спортсмен, Ньурба бэтэрээнэ Дмитрий Степанов 800 м 2 мүнүүтэ 20,4 сөкүүндэнэн кэлэн Нам учууталын, аатырбыт марафонеһы, Сойуус күрэхтэһиилэригэр тиийэ сүүрэ сылдьыбыт Степан Кириллини 3,5 сөкүүндэнэн хоппута. Yhүc булчут Дмитрий Дедюкин (Таатта) тахсыбыта.
СТАСОВТАР КҮННЭРЭ ТАХСЫБЫТА
«Пристрелка» диэн ох сааларын, ытар сирдэрин боруобалаан ытыы күнүн аахтахха, оҕунан ытааччылар оноҕосторо түөрт күн кыырайа көппүтэ. Аан бастаан эр дьон биирдиилээн бастыыр иһин 90 м сиртэн сыалы ыппыттара. Тохсуо буолан. Дьахталларга 70 м сиргэ ытыыга 3 эрэ буолан күрэхтэспиттэрэ. Хас биирдии ытааччы үстүү оноҕоһунан 12
сиэрийэ ытыыны оҥорбута. Кыайыылаах ол сууматынан быһаарыллар. ССРС успуордун маастара, ааспыт икки спартакиада чөмпүйүөнэ Павел Стасов (Чурапчы) 90,70 м сиртэн сыалы табыыга барыларын ырааҕынан куоталаан бастаабыта. Кини кэнниттэн үөрэнээччитэ Илья Васильев тахсыбыта. Yhүc миэстэлээх бэргэн ытааччынан Сунтаар хамаандатыттан Борис Максимов тахсан улахан ситиһиилэммитэ.
Дьахталлар саамай ыраах сиртэн – 70 м ытыыларыгар хас ытыы аайы Мария Прокопьева (Чурапчы) улам-улам элбэх очкону хомуйан, утарылаһааччыларыттан – Тамара Стасоваттан (Чурапчы), Варвара Гаврильеваттан (Мэҥэ-Хаҥалас) атан испитэ уонна эрэллээхтик бастаабыта. 50,30 м ыраахха ытыыга эмиэ Чурапчы спортивнай оскуолатын тириэньэрэ П.Стасов тэҥнээҕин булбата. Эмиэ Чурапчы ыччата, эдэр кэскиллээх ытааччы Илья Васильев иккис түмүгү көрдөрдө. Дьахталларга Тамара Стасова бастакы, Варвара Гаврильева иккис миэстэни үллэстибиттэрэ.
Абсолютнай чөмпүйүөн буолбут Мария Прокопьева оҕолорго бастаабыта. Хамаанданан түмүккэ Чурапчы охчуттара, бары көрүҥҥэ кыайаннар, ырааҕынан бастаабыттара. Кинилэр кэннилэриттэн Сунтаар, Ленинскэй ытааччылара буолбуттара. Эр дьоҥҥо атах оонньуутун маастара Афанасий Саввинов (Ньурба) 70 м ыраахтан ытыыга үhүc, уолаттарга Миша Николаев (Мэҥэ Хаҥалас) иккис миэстэ буолбуттарын чорботон бэлиэтиэххэ сөп.
ЮРИЙ ШИШИГИН ҮҺҮС КЫАЙЫЫТА
Гиирэни анньааччылар икки күннээх эрийсиилээх күрэхтэһиилэрэ түөрт ыйааһыҥҥа ыытыллыбыта. Помостка барыта 40-тан тахса ыарахан атлетиканан дьарыктанааччылар тахсыбыттара. Кинилэр, син штангистар курдук, үс суол эрчиллиини: жим — сыыйа өрө анньыыны, толчок — түөстэн эмискэ өрө анньыыны, рывок — аллараттан эмискэ үөһэ анньыыны толорбуттара. Гиирэ ыйааһына, быраабыла быһыытынан, 2 буут 32 киилэ. Чэпчэки ыйааһыҥҥа Өлүөхүмэ күүстээҕэ, икки бастакы спартакиада кыайыылааҕа Алексей Хворов урукку аатын-суолун бу да сырыыга түһэн биэрбэтэҕэ. Иккис миэстэни Г.Федоров (Алексеевскай), үcүhү И.Соловьев (Мэҥэ-Хаҥалас) ылбыттара.
Орто ыйааһыҥҥа Дьокуускай куораттан Василий Скрябин бастакы, Мэҥэ Хаҥаластан Валерий Бурнашов иккис, Чурапчыттан Василий Саввин үhүc тахсыбыттара. Yhүc ыйааһыҥҥа Намтан кыттыбыт Виктор Кузьмин чөмпүйүөннээбитэ.
Эрийсии ордук ыарахан ыйааһыннаахтарга тахсыбыта. Биллиилээх тустуук Виктор Михайлов (Чурапчы) уонна Юрий Шишигин (Мэҥэ Хаҥалас) хас көрүҥ аайы бэйэ-бэйэлэрин кытта ордук эрийсэн, куотуһан испиттэрэ. Холобур, В.Михайлов 42 төгүл эмискэ үөһэ аспыта. Юрий Шишигин гиэнэ — 40. Ол оннугар кини атын эрчиллиилэргэ ордук анньан, эмиэ үhүc төгүлүн Манчаары спартакиадатын кыайыылааҕынан буолбута. В.Михайлов атыттартан лаппа ырааҕынан атан, иккискэ тахсыбыта.
63-ТЭЭХ УОННА 66-ЛААХ МАДЬЫНЫЛАР
Мас тардыһыытыгар өрөспүүбүлүкэ түһүлгэтигэр барыта 23 күүстээх күөн көрсүбүтэ. 70 кг диэри ыйааһыннаахтарга 11 кыттааччы баара. Дьокуускай бэрэстэбиитэлэ, физкултуура уонна успуорт кэмитиэтин инструктора Андрей Захаров эмиэ, маҥнайты Манчаары бирииһигэр бастаабытын курдук, көрсүбүт дьонун барыларын турута тардыталаан, чахчы кыахтааҕын көрдөрөн, бастыан бастаабыта. Иккискэ – Н.Степанов (Бүлүү).
Оттон ыарахан ыйааһыҥҥа Нам күүстээҕэ Петр Степанов 11-дэ көрсүбүтүттэн тоҕyc киһитин кыайан, эрэллээхтик чөмпүйүөннээбитэ. Брызгалов (Дьокуускай) иккис, Янков (Өлүөхүмэ) үhүc миэстэлэммиттэрэ.
Саамай кырдьаҕас кыттааччынан Михаил Константинович Халланов буолбута. Кини caaha 66-та, ол гынан баран бэтэрээн билигин даҕаны тэтиэнэҕин көрдөрдө, кыттааччылар
аҥаардарын кэннигэр хаалларбыта. Тэрийэр кэмитиэт уонна судьуйалар быһаарыыларынан Михаил Константиновичка, төһө даҕаны миэстэлэспэтэҕин иһин, Манчаары бирииһин — кыһыл көмүс мэтээли туттарбыттара. Үөһээ Бүлүү спортсмена Кирилл Саввинов 63 саастааҕа. Ол үрдүнэн 11 киһини кытта тардыспытыттан алтатын кыайбыта.
КУРУЛАС АРДАХ ТҮҺҮЛГЭҔЭ МЭҺЭЙЭ
Маҥнайгы көбүөргэ, төһө да сааһырдаллар, дьарыктарын быраҕа илик, сүһүөхтэрин үрдүгэр сылдьар аҕа саастаах көлүөнэ бөҕөстөр, эдэр саастарын эргитэн хапсаҕайдаһалларын киһи үксэ кэрэхсээн, астынан көрбүтэ. Хас да киирсии кэнниттэн түһүлгэҕэ успуорт маастара, уруккута сытыы-сылбырҕа киириитинэн, быраҕыытынан аатырбыт-сураҕырбыт Сергей Ли Фу тахсыбыта. Кини Чурапчы бөҕөһө И.Захаровы кытта 6 мүнүүтэ тухары тэбис-тэҥҥэ киирсэн, тэҥнэспиттэрэ. 70 кг ордук ыйааһыннаахтарга ааспыт спартакиадаҕа бастаабыт В. Ильин Федоровтыын (Сунтаар) көрсүбүттэрэ. Балачча эрийсии кэнниттэн чөмпүйүөн аатыттан-суолуттан чаҕыйбакка киирсибит Федоров эмискэ утарсааччытын өттүктээн кэбиспитэ. Федоров аатырбыт Роман Петухову бастакы эргииргэ эмиэ быраҕан турар. Роман Петухов бастакы күн төһө да кыайтардар, кыайыыга дьулуурдааҕын көрдөрбүтэ. Кини Ленинскэйтэн сылдьар кыырыктыйбыт баттахтаах Слепцову астыктык ыйааһынынан хам баттаабыта.
Икки кырдьаҕас тустан бүтэн эрдэхтэринэ эдэрдэр түһүлгэлэригэр хаһыы-ыһыы бөҕө буола түспүтэ. Үөһээ Бүлүүттэн В.Быкалыырап быйыл көҥүл тустууга өрөспүүбүлүкэҕэ чөмпүйүөннээбит Семен Кировы (Орджоникидзевскай) кытта эрийсии бөҕө буолбуттара. Быкалыырап xaпcaҕай албаһынан биир түгэҥҥэ киһитин туруйалатан иһэн, тиэрэ тардан кэбиспитэ.
10 мүнүүтэ устата хабыр хапсыһыы успуорт бочуоттаах маастара Петр Алексеев уонна Уус Алдан аатырбыт бөҕөһө, хапсаҕай уонна көҥүл тустуу маастара Иннокентий Халдеев икки ардыларыгар буолбута. Сыралаах, элбэх албастаах тустуу тэҥнэһиинэн түмүктэммитэ. Икки тэҥ тустуук эдэрдэргэ дьоһун оскуола буолар гына дьиҥнээх хапсаҕайы көрдөрбүттэрэ.
Уйан-хатан биллэр быһаарыылаах киирсиилэрэ тиһэх күн икки түһүлгэнэн ыытыллыбыттара. Онуоха эбии күнү быһа ардах курулаччы кутан, тустарга олус ыарахан усулуобуйаны үөскээбитэ. Хапсаҕайын аанньа халты-мүлчү үктэтии, сыыһа-халты харбатыы хас көрсүһүү аайы кэриэтэ тахсыбыта. Эдэрдэргэ үгүс маастардар эрдэ туорааннар, көрөөччу буолбуттара. Ол оннугар сымсалар, күүстээхтэр ордон, финалга көрсүбүттэрэ. Ленинскэй бөҕөһө Иван Николаев Нам уолун Макар Иванову саҥардыы киирсэн иһэн, тиэрэ тэбэн түһэрбитэ. Ити кыайыытынан кини 53 кг диэри ыйааһыннаахтарга, чөмпүйүөннээбитэ. Чурапчы уола, көҥүл тустууга аатыра сылдьар Иннокентий Морфунов иккис миэстэҕэ тиксэр.
58 кг Чурапчыттан төрүттээх Бүлүүгэ борокуратуураҕа үлэлиир Степан Игнатьев ааспыт «Манчаары» чөмпүйүөнүн Иван Соловьеву (Уус Алдан) быраҕан, бастакы миэстэни уонна чөмпүйүөн аатын ылбыта. Биир да ыстарааптыыр очкота суох бастаабытын тоһоҕолоон бэлиэтиэххэ наада. 64 кг маастардар И.Халдеев уонна Чурапчыттан Станислав Романов курулас ардах ортотугар эмиэ 10 мүнүүтэни быһа арахсыбакка, эрбии биитин курдук эрийсибиттэрэ. Судьуйалар тэҥнэһиини биэрбиттэрэ. Ол гынан баран ыстарааптыыр очкота аҕыйаҕынан И.Халдеев бастакы спартакиадаҕа кыайбытын өссө төгүл чиҥэппитэ. Нам спортсмена Владимир Винокуров үhүc бочуоттаах миэстэҕэ тиксибитэ. 72 кг бөҕөстөргө Анатолий Амбросьев тэҥнээҕэ суох буолбута. 82 кг Юрий Марков (Орджоникидзевскай) Чурапчы биллиилээх маастара Петр Калачев иннигэр түһэн, пьедестал үрдүкү үктэлигэр турар чиэстэммитэ.
Саамай ыарахан, 82 кг үөһэ ыйааһыннаахтарга бу иннинэ оҕолорго тустан Манчаары икки спартакиадатыгар чөмпүйүөннээбит, Чурапчы хамаандатыгар тустубут Юрий
Андреев Василий Плотниковы (Ленинскэй), Семен Кировы (Орджоникидзевскай) хотуталаан, бастакы миэстэҕэ тахсыбыта эдэр тустуук чахчы кыахтааҕын көрдөрбүтэ.
Хапсаҕайга хамаанданан түмүккэ чурапчылар бастакы миэстэҕэ тахсыбыттара. Бу хамаандаҕа араас кэмҥэ өрөспүүбүлүкэҕэ чөмпүйүөннүү сылдьыбыт бэтэрээн тустууктар бары миэстэлэһэннэр, хамаанда кыайыытыгар наадалаах очколары аҕалбыттара. Ол курдук, 70 кг 35 саастаахтарга Петр Николаев, 80 кг Федор Эверстов иккис бириистээх миэстэҕэ тахсыбыттара. Оттон бу дьон ыйааһыннарыгар Афанасий Мачахов уонна Захар Евсеев (иккиэн Үөһээ Бүлүүлэр) бастаабыттара.
Ыарахан ыйааһыннаахтарга хапсаҕай маастара Сидор Попов утарылаһааччыларын Владимир Хаччагаевы (Үөһээ Бүлүү) уонна И.Иванову (Бүлүү) быраҕаттаан, эрэллээхтик чөмпүйүөннээбитэ. Бэйэтин кэмигэр өрөспүүбүлүкэҕэ хаста да бастаан, Саха АССР успуордун маастарын аатын бастакынан ылбыт Петр Старостин (Чурапчы) 40-45 саастаах бөҕөстөргө иккис призер буолан, табаарыстарын түһэн биэрбэтэҕэ.
70 кг ыйааһыннаах саамай аҕа саастаах көлүөнэ тустууктарга Егор Федоров (Ленинскэй), Сергей Ли Фу (Нам), Алексей Яковлев (Сунтаар), ыарахан ыйааһыннаахтарга Семен Дьячковскай (Горнай), Гаврил Федоров (Мэҥэ Хаҥалас) пьедесталга тахсар чиэстэммиттэрэ. Онон уопсай түмүккэ Чурапчы хапсаҕайдьыттарын кэнниттэн Үөһээ Бүлүү иккис, Ленинскэй үhүc, Уус Алдан төрдүс миэстэ буолбуттара. Киэһэнэн курулас ардах тохтообокко түһэн, саамай интэриэһинэй – абсолютнай чөмпүйүөн аатын былдьаһыы буолбатаҕа. Онон 1971 сыллаахха хапсаҕайга Саха сирин абсолютнай чөмпүйүөнүн аатын ылар чиэс, айылҕа мэһэйдээбитинэн, кимиэхэ даҕаны тосхойботоҕо.
ЧУРАПЧЫЛАР ӨРӨГӨЙДӨРӨ
Түөрт көлүөнэ чулууттан чулуу спортсменнар успуорт 6 көрүҥэр эрийсиилэрэ тыа сиригэр атах-илии оонньуулара сайдан иһэрин көрдөрбүттэрэ. 18 хамаанда, 400-тэн тахса спортсмен кыттыбыта.
Уопсай хамаанданан түмүк биллэриллибитигэр, сүүһүнэн спортсменнар, успуорду таптааччылар дохсун ытыстарын таһыныытын, уруйдарын-айхалларын ортотугар Баһылай Манчаары бирииһигэр спартакиада көһөрүллэ сылдьар улахан кубога олус ситиһиилээхтик кыттыбыт Чурапчы оройуонун хамаандатыгар туттарыллыбыта. Иккис, үhүc миэстэҕэ тахсыбыт Уус Алдан, Ленинскэй оройуон хамаандалара туһааннаах кубоктарынан, дьупулуомнарынан наҕараадаламмыттара. Уон бастыҥ хамаанда ахсааныгар (ылбыт миэстэлэринэн) киирбиттэрэ: Үөһээ Бүлүү, Мэҥэ Хаҥалас, Бүлүү, Горнай, Дьокуускай, Орджоникидзевскай, Нам оройуоннара.
Түмүгэр спортсменнар тыа сиригэр успуорт бары көрүҥнэрин салгыы сайыннарарга туһуланар ыҥырыы ылыныллыбыта. Спортсменнар, оройуоннарга успуорду тэрийээччилэр кэлэр спартакиадаларга күрэхтэһии бырагырааматын өссө кэҥэтэргэ баҕаларын эппиттэрэ.
Афанасий ИЛЛАРИОНОВ,
Саха АССР физическэй култуураҕа үтүөлээх үлэһитэ.