Нам улууһун II Хомустаах нэһилиэгэ Өлүөнэ өрүс уҥуор сытар буолан, олохтоохтор саас-күһүн суол суоҕуттан, оттон халаан саҕана ууга ылларан кэккэ кыһалҕалары көрсөллөр. Ол эрээри, харыларын күүһүнэн үлэлээн-хамсаан, сыспай сиэллээҕи, хороҕор муостааҕы хото иитэн, бэркэ дьаһанан олороллор. Билигин бас билии көрүҥүттэн тутулуга суох барыта 685 ынах сүөһүнү, 1197 сылгыны, 21 барааны, 114 кууруссаны кыстатан тураллар.
Саҥа үүммүт 2019 сылы нэһилиэк кэккэ ситиһиилэрдээх көрүстэ. Ол курдук, 2018 сыл устата 2 тыһ. 143 туонна от оттоммут, 713 туонна хортуоппуй, 256 туонна оҕуруот аһа хомуллубут. Ону таһынан, 83,7 туонна үүт туттарыллан, былаан 102 % толоруллубут, хайа да сыллааҕар элбэх үүт соҕотуопкаламмыт. Урукку өттүгэр Сэргэлээх түөлбэ ыаллара үүтү таһыыга ыарахаттары көрсөр эбит буоллахтарына, олохтоох дьаһалта “Синтай” тыраахтары анаан, улахан көмөнү оҥорбут. Үс хаһаайыстыба (С.С.Никонов салайар “Силис” кэпэрэтиибэ, Г.А.Протопопов салайар “Үүнэр” кэпэрэтиибэ уонна А.П.Габышев баһылыктаах бааһынай хаһаайыстыба) тыа хаһаайыстыбатын бырагыраамаларынан ылбыт граннарыгар тирэҕирэн, базаларын саҥардыбыттар уонна бааһыналарын бүтэйдээбиттэр. В.И.Лебедева биирдэм хаһаайыстыбата бэкээринэ тутуутун саҕалаабыт. Онон, 2018 сыл түмүгүнэн II Хомустаах нэһилиэгэ тыа хаһаайыстыбатын салаатыгар үрдүк көрдөрүүлэри ситиһэн, улууска бастаабыт! Тыа хаһаайыстыбатын исписэлииһэ, “Сыл бастыҥ исписэлииһэ” номинация хаһаайына А.А.Юшков билиһиннэрбитинэн, бэтэринээр быраас М.Р.Слепцов салайар нэһилиэктээҕи бэтэринээринэй учаастак “Бастыҥ бэтэринээринэй учаастак” аатын ылбыт, чулуу үлэһиттэр: С.С.Местников, Е.В.Копырин уонна М.К.Попов “Тыа хаһаайыстыбатыгар киллэрбит кылааттарын иһин” бэлиэнэн наҕараадаламмыттар.
Бастыҥ көрдөрүүлээх нэһилиэк олохтоохторо кыстыгы этэҥҥэ туоруур туһугар саҥа күнү эрэллээхтик көрсөллөр. Олохтоох бородууксуйаны үксэтэргэ туһуланан тахсар дьаһаллар олоххо киириилэригэр төһүү күүс буолаллар.
Екатерина Захарова, «Саха сирэ» edersaas.ru. сайтка анаан