НВО теле-ханаал (АХШ) киэҥник биллэр «Игра престолов»сериалын тиһэх, ахсыс сезона улахан экраҥҥа 2019 сылга тахсыаҕын бигэргэттэ. Бу туһунан бүгүн «Новости» РИА иһитиннэрдэ.
edersaas.ru
Алта серияттан турар бүтэһик сезон режиссердарынан Дэвид Бениофф, Дэн Уайсс, Дэвид Наттер, Мигель Сапочник буолуохтара. Сценарийын Дэвид Бениофф, Дэн Уайсс, Брайан Когман уонна Дейв Хилл суруйуохтара.
Ахсыс сезон премьератын даатата билиҥҥитэ чопчу биллибэт. Джордж Р.Мартин «Песнь льда и пламени» айымньытынан оҥоһуллубут сериал былырыын атырдьах ыйыгар тахсыбыт сэттис сезонун 16,5 мөлүйүөн киһи көрбүт. Сериал холугар бу үрдүк көрдөрүү.
Билэргит курдук, «Саха» көрдөрө-иһитиннэрэр хампаанньа ааспыт сыл ахсынньытыгар сериал продюсердарыгар «Игра престолов» тиһэх сезонун Саха сиригэр уһуларга этии киллэрэн турар. Өрөспүүбүлүкэ теле-хампаанньата НВО теле-ханаалга официальнай суругар сериалы уһулууга көмө-өйөбүл буоларга бэлэмин биллэрбитэ. АХШ теле-ханаала суругу туппутун бигэргэппитэ эрээри, билиҥҥитэ туох да диэн хоруйдуу илик. Бу иннинэ сериал кыһыҥҥы көстүүлэрэ Исландияҕа, Ватнайекюдль национальнай пааркаҕа уһуллубуттара.
Манна даҕатан эттэххэ, «Игра престолов» сүрүн дьоруойдарын почта мааркаларыгар үйэтитиэхтэрэ. Уон биэс мааркаттан турар коллекция АХШ сериалыгар Великобритания кылаатын чорботон бэлиэтиэҕэ.
Роман Попов, «Саха сирэ» хаһыат, edersaas.ru
Хаартыскалар Интэрниэттэн ылылыннылар.