Сылтан сыл Алексей Илларионов IT-оскуолатын үөрэнээччилэрин ситиһиитэ биллэ-көстө элбээн иһэр. Алексей оскуолатыгар бэйэтэ HTML, CSS, Javascript уонна 3D-моделированиены үөрэтэр. Ол курдук, аан дойдутааҕы сериаллар рейтиннэригэр бастакы миэстэҕэ турар, дьон биһирэбилин ылбыт, «Игра Престолов» сериал истииллээх, Саха сирин киэн туттар улуустарын туһунан видео оҥорбуттар.
Видеоҕа Дьокуускай уонна Миирнэй куорат, Хаҥалас, Өймөкөөн, Кэбээйи уонна Нам улуустара сырдатыллаллар. Гербэлэрэ уонна тугунан киэҥ тутталлара олус үчүгэйдик ойууламмыт. Видеону көрөөт, улуус туһунан уопсай өйдөбүлү ылаҕын.
Алексей Илларионов 17-с нүөмэрдээх оскуолаҕа учууталынан үлэлии сылдьан, IT-оскуола тэринэргэ санаммыт. Ити санаатын оскуола дириэктэрэ Лена Афонская өйөөбүт, олоххо киллэрэригэр сүрүн көмөнү оҥорбут. Онтон Арктика Инновационнай киинин дириэктэри солбуйааччы Надежда Степанова, Алексей идеятын өйөөн, оскуола бастакы олугун уурбут. Алексей бэйэтэ этэринэн, «кини өйөөбөтөҕө буоллар, оскуолам баҕа санаа курдук хаалыа эбит», — диэн бэлиэтиир. Онтон кэлин атаҕар туран баран, Алексей бэйэтэ офис арендалаан, күүстээх таһаарыылаах үлэтин саҕалаабыта.
Николай Попов «Саха сирэ» хаһыат, edersaas.ru