2020 сыл сэтинньи 30 күнүгэр Өймөкөөн оройуонугар Тарыҥ – Уус-Ньара массыына суолугар күндү уолбут, тапталаах кэргэн , түөрт оҕо амарах аҕата, кыһамньылаах бииргэ төрөөбүт, үгүс аймахтарыгар ытыктанар сиэн быраат, бэриниилээх доҕор, «Золотой актив» ХЭУо технолог-байытаачыта Матвеев Игорь Андреевич олоҕо соһумардык быстыбытын дириҥ кутурҕанынан биллэрэбит.
Кини баара эрэ 34 сааһыгар үгүһү оҥордо, ситистэ: Москватааҕы ыстааллар уонна уһаарыылар институттарын ситиһиилээхтик үөрэнэн бүтэрээт, «Эста-Гео» экспетрнэй-технологическай кииҥҥэ (Москва) инженеринэн үлэлээбитэ. Аспирантураны бүтэрэн, Арассыыйа Наукаларын академиятын Сибиирдээҕи салаатын Хоту сир хайа дьыалаларыгар институтун научнай үлэһитинэн буолбута. Кэлин икки сылга «Золотой актив» ХЭУо-ҕа инженер-технологтаабыта.
Производствоны уонна науканы холбуу дьүөрэлээн, сүрдээх ноҕуруусканы сүгэрэ. Өрөспүүбүлүкэ илиҥҥи өртүгэр көмүһү ылгыыр икки саҥа бөдөҥ фабриканы үлэҕэ киллэрэргэ көмө-тирэх буолбута. Олортон биирдэрэ – көмүһү хостуур «Богуславец» ХЭУо тэрилтэҕэ.
Биһиги Игорьбыт дьону, олоҕу олуһун да таптыыра, кимиэхэ барытыгар үтүө көмөҕө кэлэргэ, өйөбүл буоларга бэлэм этэ. Кыра сааһыттан чөл, чэбдик олоҕу тутуспута, туохха барытыгар сиэрдээх, ыллыктаах, кырдьыктаах көрүүлэринэн уратылааҕа. Бииргэ үөрэммиттэрин, биир идэлээхтэрин кытта ыкса, доҕордуу сыһыаннааҕа. Мэлдьи чуолкай, олоххо тардыһыылаах, сэргэх уйулгулаах оҕобут доҕотторугар, аймахтарыгар, Хаҥалас улууһугар төрөөбүт Хачыкаатыгар өрүүтүн туһалыы сылдьыан баҕарара, бэл, нэһилиэк баһылыгын быыбарыгар кыттыбыта да ону туоһулуур.
Инникитин элбэх былааннардааҕа: кандидатскай диссертациятын көмүскээһин, научнай чинчийиилэрин салгыы ыытыы, өрөспүүбүлүкэ бырамыысыланнаһыгар ураты суолталаах инновационнай бырайыактары олоххо киллэрии, олор истэригэр бэйэтин тус арыйыыларын… Институкка үлэлээбит кэмигэр кыттыгас авторство быһыытынан 43 ыстатыйаны бэчээттэппитэ уонна айан оҥоруу 3 патенын ылбыта. Норуоттар икки ардыларынааҕы уонна Арассыыйатааҕы научнай кэмпириэнсийэлэргэ кыттыбыта, институт уопсастыбаннай, спортивнай олоҕор актыыбынай кыттыыны ылара. Уопсайынан, үгүс салааларга саҥа идиэйэлэрдээҕэ, көрүүлэрдээҕэ, улахан, дьоһуннаах дьыалаларга бэйэтин кыаҕын, күүһүн тургутунуон, туһаныан баҕарара.
Тапталлаах кэргэнэ Мариялыын түөрт оҕону төрөтөн, бүөбэйдээн ыал буолар дьолун билбитэ. Кырачаан игирэ уолаттара биир саастара туолуутун дьиэ кэргэнинэн үөрэ-көтө бэлиэтииргэ бэлэмнэнэрэ…
Биһиги аймахха, кинилиин алтыспыт, кинини таптыыр дьоҥҥо тугунан да толуйуллубат ыар сүтүк тулуйуллубат ыар аһыыта ыарыылаахтык саба халыйда. Маннык эдэр дьон, күүстэрин-уохтарын
үгэнигэр сылдьан, иэдээҥҥэ түбэһэн, олохтон хомолтолоохтук бараллара ыарахан.
Тапталлаах, төрөөбүт Хачыкаатын сирэ-буора киниэхэ түү курдук чэпчэки, сымнаҕас олбох, сабыы буоллун…
Аймахтара, чугас дьоно.