Аҕыйах хонуктааҕыта СӨ Наукаларын академиятыгар отчуоттуур-быыбардыыр мунньах буолан ааспыта. Отчуоту сэргэ тирээн турар кыһалҕалары, инники соруктары ааттаталаатылар.
Кылаабынай учуонай сэкирэтээр Юрий Григорьев 2017 сылга СӨ Наукаларын академиятын салааларын, чилиэннэрин научнай уонна научнай-тэрийэр сүрүн үлэлэрин туһунан кэпсээтэ. Биллэн турар, биэс сыл устата үгүс үлэ толоруллубут, чинчийии ыытыллыбыт.
Бэрэсидьиэн Игорь Колодезников бэлиэтээбитинэн, СӨ Наукаларын академиятыгар тосту уларытыы түгэнинэн 2010 сыллаахха, оччолорго бырабыыталыстыба бэрэссэдээтэлэ Егор Борисов уонна бырабыыталыстыба бары састааба кыттыылаах киэҥ ыҥырыылаах мунньах буолбутун бэлиэтээтэ.
2016 сыллаахха Ил Дархан көҕүлээһининэн, дойду бэрэсидьиэнин сорудаҕынан 2016-2020 сс. Саха Өрөспүүбүлүкэтигэр комплекснай научнай чинчийии саҕаламмыта. Учуонайдар бүгүҥҥүтэ иккис түһүмэххэ ылсаллар. Ити курдук, бары эйгэни хабан, үлэ хас даҕаны хайысханан тэҥинэн барар.
Игорь Колодезников СӨ Наукаларын академиятын президиумун уонна чилиэннэрин үлэлэрин туһунан кэпсээтэ. Ону тэҥэ, баар кыһалҕалары, инники соруктары ыйда. Итинтэн сиэттэрэн, түөрт сүрүн түгэҥҥэ тохтуур оруннаах. Бастатан туран, 2008-2018 сс. Академия ыытар үлэтин үбүлээһин 4,5 төгүл үрдээбит. Ол эрээри, анаалыс көрдөрбүтүнэн, научнай чинчийиилэри оҥорууга уонна научнай-тэрийэр үлэҕэ көрүллэр үп материальнай ороскуота эбиллибэт, сороҕор аччыыр түгэннэрдээх эбит.
Иккиһинэн, бэрэсидьиэн: “Биһиги туспа судаарыстыбаннай сорудаҕынан үлэлиибит. Ити үчүгэй. Чопчу соруктары көдьүүстээхтик толорорбутугар кыаҕы үөскэтэр. Ол эрээри, ырааҕы көрүөх тустаахпыт. Үлэ ити ньымата биһиги айар кыахпытын кыаратар, наука оскуолатын тэрийэри, эдэр каадырдары көдьүүстээхтик бэлэмниири, лабораторнай баазаны олоҕурдары хааччахтыыр. Биһиги, өрөспүүбүлүкэбитигэр туһалаах чопчу научнай хайысхалары быһаарыахтаахпыт”, — диэн эттэ.
Үсүһүнэн, СӨ Наукаларын академията күн бүгүн 38 дьиҥнээх чилиэннээҕиттэн, 20 эрэ бырыһыана 65 диэри саастаах эбит, онон эдэрдэри талартан куттанымыахха наада диэн тоһоҕолоон бэлиэтээтэ.
Төрдүһүнэн, президиум научнай салаалара Арассыыйа уонна Уһук Илин Граннарын куонкурустарыгар, тус сыаллаах федеральнай бырагыраамаларга кыттыылара, Саха сиригэр баар араас хампаанньалары, фирмалары, аахсыйалаах уопсастыбалары кытта үлэлэһии намыһаҕын ыйда итиэннэ ити боппуруостарга ураты болҕомтону уурар наадатын эттэ.
Онон, үөһэ ыйыллыбыт “дорожнай каартаттан” сиэттэрдэххэ уонна бэрэсидьиэн Игорь Колодезников туруорбут соругуттан, президиум чилиэнин састааба уларыйыытыттан көрдөххө, СӨ Наукаларын академиятын үлэтигэр уларыйыы тахсар чинчилээх.
Людмила ПОПОВА, “Саха сирэ” хаһыат, edersaas.ru