«Иккиэн биирдэр, игирэлэр иккиэлэр» диэн өрөспүүбүлүкэ таһымнаах куонкурус Дьокуускайга А.Е.Кулаковскай аатынан норуоттар доҕордоһууларын дьиэтигэр өрө көтөҕүллүүлээхтик ыытылынна. Тэрээһиҥҥэ аҕыс улуустан кэлэн кытыннылар. Бу туһунан сиһилии норуоттар доҕордоһууларын дьиэтин пресс-сулууспатыттан иһитиннэрдилэр.
—Уус Алдантан, Намтан, Хаҥаластан, Орто Халыматтан, Чурапчыттан, Тааттаттан, Бүлүүттэн, Мэҥэ Хаҥаластан, Дьокуускайтан 14 паара үүт-үкчү игирэлэр кэлэн түһүлгэҕэ кытыннылар. Бастатан туран, кимтэн кииннээхтэрин, хантан хааннаахтарын билиһиннэрдилэр. Тугунан үлүһүйэн дьарыктаналларын, хоббиларын кэпсээтилэр. Национальнай таҥастаах, театральнай көстүүмнээх тахсан ырыаны, үҥкүүнү көҕүлүттэн туттулар. Мааны таҥастаах-саптаах муусука доҕуһуолугар уйдаран оргууй хаамтылар. Саамай долгутуулаах мүнүүтэнэн, игирэлэр күн күбэй ийэлэрин кытары саалаҕа толору мустубут көрөөччүлэр иннилэригэр тахсыылара буолла. Ийэлэргэ сүгүрүйэн, ытыс тыаһа өргө диэри тохтообокко ньиргийэн олордо.
Күөн күрэс түмүгүнэн гран-при аатын Айза, Айна Седалищевалар ыллылар. Кыргыттар Уус Алдан Лөгөй орто оскуолатын ахсыс кылааһыгар үөрэнэллэр. Кыайыылаах игирэчээннэр бэйэ-бэйэлэригэр тардыһар ыкса сибээстээхтэрин бэлиэтээн эттилэр. «Аттыгар эдьиийиҥ, балтыҥ, үкчү дьүһүннээх бастыҥ, эрэллээх доҕоруҥ баара олус үчүгэй», — дэстилэр. «Көрөөччүлэр биһирэбиллэрэ» Орто Халыматтан Дьокуускайдааҕы культура уонна искусство кэллиэһигэр үөрэнэр Святослав, Борислав Колесовтарга дохсун ытыс тыаһыгар доҕуһуолланан туттарылынна.
Үөрүүлээх тэрээһиҥҥэ «Тетрис» үҥкүү норуодунай ансаамбыла (сал. Тамара Савочкина, Татьяна Матюшенко), «Сюрприз» РФ образцовай кэлэктиибэ, үҥкүү норуодунай ансаамбыла (сал. Ирина Егорова) кытыннылар. Иллюзионист Алексей Гольдеров, Дмитрий Павлов — Мистер Саксофон, Ирена Файрушина, «Сэргэлээх сулустара» ансаамбыл (сал. СӨ норуодунай артыыһа Алексей Егоров), Любовь Каратаева, «Алаас кыргыттара» ансаамбыл (сал.Елена Прокопьева), Егор Толбонов дьоро киэһээни тупсаран, киэргэтэн биэрдилэр. Ону сэргэ, дьиэ кэргэттэр дуэттара Тайыына уонна Айтыына Романовалар, «Рукавицы» үҥкүүнү Прасковья Аринкина кыргыттарын Лизаны, Софияны, Настяны, Аленаны уонна «Бриллианты Якутии» ансаамбыл үҥкүүһүттэрин кытары толоруулара көрөөччүлэри уратытык сэргэхситтэ. Бырайыак ааптара — СӨ культуратын үтүөлээх үлэһитэ Светлана Лукина, тэрийээччи А.Е.Кулаковскай аатынан норуоттар доҕордоһууларын дьиэтэ.
Көрөөччүлэр тэрээһинтэн улаханнык астынан, дуоһуйа сынньанан тарҕаспыттар. Аныгыскы күрэскэ өссө элбэх кыттааччы кэлэригэр баҕарбыттар.
Хаартыскалар: А.Е.Кулаковскай аатынан норуоттар доҕордоһууларын дьиэтэ
+1
+1
+1
+1
+1
+1
+1