Ньурба улууһун Күндээдэтин чааһынай хаһаайыстыбатыгар биир ынах игирэ ньирэйи төрөттө.
edersaas.ru
Нэһилиэктээҕи бэтэринээринэй учаастакка тохсунньу 12 күнүгэр кэтэх ыал аҕыс саастаах ынаҕа кыайан төрөөбөккө турарын туһунан суһал ыҥырыы киирбитэ. Бэтэринээр-биэлсэр Наталья Иванова тиийэн көрбүтэ, ынах оҕолоро игирэлэр, бастакы ньирэй этэҥҥэ быыһаммыт, иккиһэ төбөтө уонна биир атаҕа быган баран, туохтан эрэ иҥнэн, “кэлбэккэ” турар эбит.
Бэтэринээр ынаҕы көрөн-истэн баран, ньирэй иккис атаҕа токуруйан хаалбытын быһаарбыта. Ол иһин, асептика уонна антисептика ирдэбиллэрин толору тутуһан, ньирэй төбөтүн иһирдьэ анньан баран, илиитин уган, ньирэй атахтарын көннөрөн баран тардан таһаарбыта. Билигин ынах да, ньирэйдэр да туруктара этэҥҥэ. Даҕатан эттэхэ, бу ынах урукку өттүгэр эмиэ игирэ ньирэйдэри төрөппүт эбит.
Раиса Сибирякова, «Саха сирэ» хаһыат, edersaas.ru