“Якутскэнерго” ПАУо Энергосбытын үлэһиттэрэ Дьокуускай куорат Строительнай уокуругун управатын, “Курчатова Е.Л. ИП” салайар хампаанньа бэрэстэбиитэллэрин кытары уот харчытын кэмигэр төлөөбөт туһанааччылары кэрийдилэр.
edersaas.ru
Кистэл буолбатах, билигин уот, ититии харчытын хас да ыйы быһа төлөөбөт дьон элбэх. Кэмиттэн-кэмигэр төлөөбөккө улахан иэскэ-күүскэ киирэллэр. Холобур, Космонавтар уулуссаларын 9-гар олорор киһи аҥаардас уотунан туһаныыга 80 тыһыынча солкуобай иэстээх. Абонеҥҥа иэскин төлөө диэн хаста даҕаны этэн баран уотун араара сылдьыбыттар. Ону электричество ситимигэр быһалыы холбоммут. Рейдэ кэмигэр хаһаайка кыбартыыратын аанын аспатах, онон уотун эмиэ араарбыттар.
Оттон Космонавтар уулуссаларын 13/1-гэр олорор абонент иэһэ — 73 тыһыынча солкуобай.
«Улахан иэскэ-күүскэ киирбэт курдук, уот харчытын кэмигэр төлөөҥ. Хомунаалынай өҥө төлөбүрүгэр иэстээх дьоҥҥо иэстэрин аҕыйатыыга биһиги куруук үлэлэһэбит. Дуогабар түһэрсэн, иэскитин хас да чааска үллэрэн, сыыйа төлүөхтэрин сөп”, — диэн Энергосбыт дириэктэрин солбуйааччы Светлана Кукушкина этэр.
Хомунаалынай өҥө харчытын уһатан төлүүр туһунан (рассрочка) Энергосбыт отделениеларыгар уонна учаастактарыгар кэлэн билсиэххитин сөп. Оттон Дьокуускай куоракка олорооччулар Федор Попов уулуссатын 21 дьиэтигэр баар кииҥҥэ билсиҥ. Сиһилии 8-800-100-22-05, 8 (4112) 498-498 төлөпүөннэринэн ыйыталаһыҥ.
Биһ. корр., edersaas.ru