Сүрэххэ-дууһаҕа иҥмит оспот баас санаа ыар баттыга буолан, иэстэһэр баҕа күннэтэ мунньуллан, ураты ыарахан буруйу оҥорууга тиэртэҕэ.
Нерюнгрига икки киһини соруйан өлөрүү ыстатыйанан холуобунай дьыала тэриллибитин туһунан РФ Силиэстийэлиир кэмитиэтин Саха сиринээҕи управлениета иһитиннэрдэ. Холуобунай дьыала Золотинка бөһүөлэгэр буолбут баһаарга эр киһи уонна дьахтар өлүктэрэ көстүбүт чахчытынан тэриллибит.
51 саастаах дьахтар уонна 57 саастаах киһи өлүктэрэ Железнодорожная уулуссаҕа турар дьиэ биир кыбартыыратыгар көстүбүттэр. Экспертэр быһаарбыттарынан, өлүү биричиинэтинэн үгээрдээһин буолбут.
Быһылаан буолбут сирин, онно булуллубут маллары үөрэтии-чинчийии уонна да атын бэрэбиэркэлиир тэрээһиннэр кэннилэриттэн силиэдэбэтэллэр эмсэҕэлээччилэр өлүүлэрэ «криминальнай» суоллааҕын-иистээҕин быһаарбыттар.
Бу буруйу оҥорууга уорбаланан, 32 саастаах киһи тутуллубут.
Уорбаланааччы силиэдэбэтэлгэ билиммитинэн, кини кыбартыыраны, ити эр киһиэхэ иэстэһэн, уоттаабыт. Ити киһи кини ийэтин урукку кэргэнэ эбит. Ийэтэ 2012 сыллаахха өлбүтүгэр бу киһини (оччолорго кииринньэҥ аҕатын) буруйдуу саныы сылдьыбыта итинник ыар буруйга тиэрдибит.
Уорбаланааччы силиэстийэлиир изоляторга хаайыллыбыт. Силиэстийэ салҕанан барар.
Биһиги корр., «Саха сирэ» хаһыат, edersaas.ru
Хаартыскалар: РФ Силиэстийэлиир кэмитиэтин Саха сиринээҕи управлениета.