Үгэс буолбут Табаһыт күнүн быйыл Иенгра олохтоохторо Нерюнгри оройуонун бастакы бочуоттаах олохтооҕо Семен Леханов 100 сааһыгар уонна оройуоҥҥа Чөл олох сылыгар анаатыгар.
Сэвэкан сиэрин толорууттан саҕаламмыт бырааһынньыгы үөрүүлээхтик арыйыыга мустубут дьону Нерюнгри оройуонун баһылыга Виктор Станиловскай, Иенгра эбэҥки национальнай нэһилиэгин баһылыга Ольга Игнатенко уо.д.а. эҕэрдэлээтилэр. Табаһыт күнүн бэлиэтии тыһыынчанан киһи кэлбит, ол иһигэр Норвегияттан, Санкт-Петербургтан, Москваттан уонна Дьокуускайтан ыалдьыттар бааллар. Күнүскү өттүгэр «Үгэс буолбут билии уонна аһылык култуурата» диэн семинар ыытылынна, киэһэ өттүгэр табаһыттары чиэстээһин буолла. «Аһылык култуурата — хотугу сир норуоттарын олохторун тирэҕэ» уонна «Дэвэлчэн — 2018» куонкурустарга эбэҥки минньигэс астаах асчыттара таба этиттэн, тылыттан уонна хааныттан астаммыт ас-үөл арааһын, «Аяврив эвэды тэткэв» көрүүгэ уран тарбахтаах иистэнньэҥнэр таба уонна күндү түүлээх таҥас эгэлгэтин тардан кэбистилэр.
Бырааһынньык буолан баран, хайдах илии-атах оонньуута суох буолуой? Хапсаҕайга 70 киилэҕэ диэри Станислав Кронгауз, ыарахан ыйааһыҥҥа Владимир Коломеец тэҥнээхтэрин булбатылар. Мас тардыһыытыгар 70 киилэҕэ диэри ыйааһыннаахтарга Андрей Щетинин, 80 киилэҕэ диэри Афанасий Созонов, ыарахан ыйааһыҥҥа Сергей Киселев хоттулар. Маамыктаны быраҕыыга 32 киһи киирсибититтэн, дьахталларга Оксана Семенова, эр дьоҥҥо Дмитрий Александров аҥардастыы аатырдылар. Саамай кэтэһиилээх, элбэх ыһыылаах-хаһыылаах, көхтөөх көрөөччүлэрдээх күрэхтэһиинэн табанан сүүрдүү буолла. Оҕолор сыарҕалаах табанан сүүрдүүлэригэр Константин Александров, кыргыттарга Яна Кириллова, уучаҕынан сүүрдүүгэ Костантин Енохов, кыргыттарга Алексанра Кириллова кыайдылар, отон уопсай сүүрдүүгэ Эдуард Александров уонна Яна Кириллова чөмпөйүөннээтилэр. Улахан дьоҥҥо эмиэ хас да түһүмэхтэх сүүрдүү буолла. Эр дьоҥҥо 8 км. дистанцияҕа Александр Кириллов, дьахталларга 5 км. Алена Колесова тэҥнээхтэрин булбатылар.
Норвегияттан кэлбит Арктика университетын циркумполярнай таабны иитиигэ институтун дириэктэрэ Матисен Свейн, Ямал-Ненец уонна Долган-Ненец автономнай уокуруктарын табаһыттарын бэрэстэбиитэллэрэ таба иитиитин сайыннарыыга бииргэ үлэлээһиҥҥэ анаммыт семинардарга көхтөөхтүк кытыннылар. Табаһыт күнүн бырааһынньыга үрдүк таһымна тэриллибитин бэлиэтээтилэр, бэркэ астынан бардылар.
Виктория Харитонова, «Саха сирэ” хаһыат, edersaas.ru. сайтыгар анаан.
Павел Усаченко хаартыска түһэриилэрэ.
