Иенгра саҥа балыыһаланыа.
Дьон көрдөрөр уонна сытан эмтэнэр балыыһатын тутуутугар генеральнай бэдэрээччит быһаарыллыбыт. Амбулатория тутуллуохтаах сирин чинчийии үлэтэ былырыын ыытыллыбыт. Билигин былаһаакканы бэлэмнээбиттэр. Монтаж үлэтэ бу ый, оттон ис үлэтэ балаҕан ыйыгар саҕаланыахтаах. Бу туһунан Нерюнгри дьаһалтатын саайтыгар этиллэр.
Иенграҕа 1975 сыллаахха тутуллубут стационар хаарбах туруктаах буолан, 2019 сыллаахха сабыллыбыт.
—Саҥа балыыһа биир мэндиэмэннээх, 250 кв.м. иэннээх буолар. Бырайыагынан манна терапевт уонна педиатр хосторо, стоматология, процедурнай, быһыыны туруорар хос, медперсонал уонна ыстаарсай медсиэстэрэ хоһо, регистратура, о.д.а. хостор былааннаналлар. Амбулатория икки отделениелаах буолар: амбулатория уонна күнүскү стационар. Күнүскү стационарга иккилии куойкалаах палааталарданар, улахан дьоҥҥо уонна оҕолорго, — диэн этэр Нерюнгри оройуонун киин балыыһатын кылаабынай бырааһа Алексей Яворскай.
Тутуу суумата 19,9 мөл.солк. Маны таһынан, мэдиссиинэ тэрилин уонна анал миэбэли ыларга харчы көрүллүбүт.
Иенграҕа күнүскү стационардаах амбулаторияны тутуу «Развитие системы оказания первичной медико-санитарной помощи» эрэгийиэн бырайыагар киллэриллибит. Кэнники үс сылга Нерюнгри оройуонугар Золотинкаҕа биэссэр пууна, Чульмаҥҥа, Беркакикка, Серебрянай Борга поликлиникаларга уонна стационардарга хапытаалынай өрөмүөннэр, материальнай-тэхиньиисчэскэй баазаларын уларытыылар ыытыллыбыттар. Оттон быйылгы испииһэккэ Иенгра саҥа амбулаторията эбиллиэҕэ.
+1
+1
+1
+1
+1
+1
+1