Тохсунньу 1 күнүнээҕи чахчынан, өрөспүүбүлүкэ үрдүнэн кыылы иитиигэ идэтийэр алта хаһаайыстыбаҕа барыта холбоон 2,3 тыһ. кырымахтаах хара саһыл, 300 киис, сүүстэн тахса кырса баара.
edersaas.ru.
Нерюнгри оройуонун Иенгра бөһүөлэгэр баар «Золотинка» МУТ иллэрээ сыл Арктика судаарыстыбаннай кэмитиэтэ оройуон дьаһалтатын кытары түһэрсибит сөбүлэһиитин быһыытынан, былырыын саас Финляндия технологиятынан саҥа былаһаакканы, саҥа щедтэри оҥорбута. Быйыл кыһын кыыл аһылыгын бэлэмниир улахан кыамталаах аһылык куукунатын үлэҕэ киллэрбитэ.
Иллэрээ сыл Тверь уобалаһыгар баар «Савватьево» диэн кыылы иитэр племенной хаһаайыстыбаттан боруобаҕа 30 киис оҕотун аҕалбыта, уопуттаах кыылы көрөөччүлэр этэллэринэн, киис оҕолоро ситэн-хотон, төрүөҕү биэрэллэригэр үс сыл ирдэнэр эбит. Оттон былырыын Норвегияҕа ууһатыллыбыт хара саһылы аҕалбыта. Ити курдук үлэ усулуобуйатын төрдүттэн тупсарыыга, кыыл ахсаанын элбэтиигэ хоһууннук үлэлиир хаһаайыстыба кыылын ахсаана тыһыынчаҕа тиийдэ. Кулун тутартан төрүөх саҕаланан, билигин хайы-сах 500 хара саһыл оҕото баар буолла.
– Барыта 400 хара саһыллаахпыт, ол иһигэр 320 ийэ саһыл баар, – диир хаһаайыстыба дириэктэрин производство боппуруоһугар солбуйааччы Ньургун Владимиров. –– Былырыын эксперимент быһыытынан аҕалбыт хара саһылларбыт этэҥҥэ олохсуйан, төрөөн эрэллэр. Мантан саас өссө төрүөхтэрэ.
Раиса Сибирякова, «Саха сирэ» хаһыат, edersaas.ru