Саха Өрөспүүбүлүкэтин Ис дьыалаҕа министиэристибэтин 2011-2014 сылларга салайбыт урукку миниистир Виктор Кошелев астаапкаҕа барар туһунан араапар суруйбутун туһунан «Ura.ru» иһитиннэрэр.
Виктор Васильевич Саха сириттэн 2014 сыллаахха Пермскэй кыраай Ис дьыалаҕа министиэристибэтин кылаабынай управлениетын начаалынньыгынан ананан, ол эбэтэр, дуоһунаһа үрдээн барбыта. Онно тиийэн, званиета эмиэ үрдээн, полиция генерал-лейтенана буолбута (манна генерал-майор этэ).
Астаапкаҕа барар туһунан араапар суруйбутун Кошелев коллегия мунньаҕар иһитиннэрбит. Сулууспа түмүктэнэр сааһын сиппиппинэн диэн быһаарбыт.
«URA.RU» суруйарынан, Пермскэй кыраай кылаабынай полицейскайа биэнсийэҕэ барыыта бу ыам ыйын бүтүүтүгэр 5 сылга биирдэ ыытыллар Россия ИДьМ-тын улахан федеральнай бэрэбиэркэтин кытта сибээстээх эмиэ буолуон сөп эбит. 60 сааһын сэтинньи 19 күнүгэр туолуохтаах, ол эбэтэр, өссө да сыл аҥаара үлэлиир кыахтаах этэ диэн суруйаллар.
Полиция генерал-лейтенана Виктор Кошелев астаапкаҕа барбытын туһунан Официальнай правовой информация интэриниэт-портала эмиэ бигэргэтэр. Бу портал иһитиннэрэринэн, Владимир Путин ыйааҕынан полиция уонна Силиэстийэлиир кэмитиэт 5 генерала итиэннэ икки регион борокуруордара дуоһунастарыттан босхоломмуттар. Олор ортолоругар Виктор Кошелев аата эмиэ баар.
«Варяг» миниистирдэртэн кинини эрэ Саха сирин олохтоохторо үтүө тылынан ахталлар.
Вера Макарова, «Саха сирэ» хаһыат, edersaas.ru
Хаартыска: ааптар түһэриитэ.