Дьокуускайга уопсастыбаннай бырайыактары олоххо киллэрэргэ идиэйэни түмэр стратегическай сиэссийэ саҕаланна. Манна экспиэртэр, кэмиэрчэскэйэ суох түмсүүлэр, толорор былаас уорганнара, олохтоох салайыныы, эдэр урбаанньыттар, ыччат лиидэрдэрэ муһуннулар.
Уопсастыбанныктар бэйэлэрин идиэйэлэрин, бырайыактарын араас федеральнай, эрэгийиэн таһымнаах куонкурустарга кыттан билиһиннэрэллэр.
— Билиҥҥи туругунан эрэгийиэҥҥэ уонна дойду үрдүнэн элбэх уопсастыбаннай бырайыактар олоххо киирэн тураллар. Онон бүгүҥҥү сиэссийэҕэ сүрүн идиэйэлэри, бырайыактары көрөн өрөспүүбүлүкэбитин уонна Уһук Илини сайыннарар бырайыактары кэпсэтиэхпит. Манна бүгүн саҥа саҕалааччы уопсастыбанныктар, ону сэргэ үлэлэһэр да дьон муһунна. Онон интэриэһинэй идиэйэлэри кэтэһэбит, — диэтэ вице-премьер Ольга Балабкина.
Стратегическай сиэссийэ үс блогунан ыытыллыаҕа. Ол курдук кыттааччылар хамаандаларынан арахсан саҥа бырайыактары толкуйдуохтара. Уопсай сүбэ түмүгүнэн биир уопсастыбаннай бырайыак талыллыаҕа.
Ульяна ЗАХАРОВА.