Кыстык хасааһын уоруу элбээтэ

Бөлөххө киир:

Идэһэ дьаһайыллан, үлэ-хамнас үмүрүтүллэн, нус-хас кыстыкка киирии —  саха ыалын үгэһэ.

Онуоха ыал кыһыҥҥы хаһаас аһылыгын уоруу Майа сэлиэнньэтигэр икки төгүллээн хатыланна. Майа нэһилиэгин олохтооҕуттан 23 киилэ ынах этин ас хаһаанар кыладыапкатыттан уорбуттар. Түөкүн ыйанан турар ыаҕас күлүүһү алдьатан ыал кыстыыр аһын сойбоппут. Эмсэҕэлээччи ночоото 10 350 солкуобайга тэҥнэспит.

Иккис түгэн эмиэ маныаха маарынныыр. Эмиэ бу нэһилиэк олохтооҕуттан туох баар кыһыҥҥы хасааһын барытын уорбуттар. Уоруллубут аһылык ороскуота быһаарылла сылдьар. Бу икки быһылаан тула Арассыыйа Федерациятын холубунай кодексатын«уоруу» диэн 158 ыстатыйа иккис чааһынан холуобунай дьыала тэрилиннэ.  Суһал ирдэбил үлэһиттэринэн 31 саастаах, элбэхтэ сууттана сылдьыбыт уорбаланааччы тутулунна.

Үһүс маннык быһылаан Таатта улууһун Харбалаах нэһилиэгэр буолла. Ыал тэрээһэтиттэн 10 киилэ ынах этэ сүппүт. Ороскуот 5 000 солкуобайга тэҥнэспит. Полиция үлэһиттэрэ 44 саастаах Харбалаах олохтооҕун туттулар. Уорбаланааччы дьиэҕэ хаһаайыттар суохтарын туһанан тэрээһэҕэ киирэн эти уорбут. Уорбаланааччы холубунай дьыалаҕа хаста даҕаны түбэһэ сылдьыбыт эбит. Арассыыйа Федерациятын холубунай кодексатын «уоруу» диэн 158 ыстатыйа иккис чааһынан холуобунай дьыала тэрилиннэ.

Төрдүс быһылаан Дьокуускай куорат 17-с кыбаарталыгар буолла. Түннүк эркинигэр таһырдьа дьааһыкка ыйанан турбут ыал аһылыгын уордулар. 4-с №-дээх полиция салаатын үлэһиттэрэ 17 уонна 21 саастаах икки уорбаланааччылары туттулар. Арассыыйа Федерациятын холубунай кодексатын «уоруу» диэн 158 ыстатыйа иккис чааһынан холуобунай дьыала тэрилиннэ.

Ульяна ЗАХАРОВА, edersaas.ru

+1
0
+1
0
+1
0
+1
0
+1
0
+1
0
+1
0