Өрөспүүбүлүкэ лиссиэйигэр “Айылҕа ситимэ” диэн бырайыак үлэлээбитэ уонтан тахса сыл буолла. Иилээччинэн-саҕалааччынан уонна билигин даҕаны салайан үлэлэтэ сылдьааччынан биология учуутала Анна Егоровна Местникова буолар.
Бырайыак чэрчитинэн бэһис кылааһы бүтэрбит оҕолор “Алаас эйгэтэ”, алтыһы бүтэрбиттэр – «Хочо олоҕо”, сэттис кэнниттэн — “Хайа түөлбэтэ”, ахсыһы түмүктээбиттэр – “Киһи айылгытын уратыта”, тохсус кэннэ – “Киһи бэйэтин бэйэтэ салайынар” хайысхаларынан утумнаахтык дьарыктаналлар. Сэттис кылааһы бүтэрбит оҕолор экспедицияларын туһунан саха тылын уонна литературатын учуутала Саргылаана Игнатьева кэпсээтэ.
—Сэттиһи бүтэрбит уон аҕыс оҕону илдьэ экспедицияҕа Алдан оройуонугар бара сырыттыбыт. Хатыыстыыр орто оскуолатыгар базаланан олордубут. Олохтоохтор ыраахтан кэлбит айанньыттары үөрэ-көтө көрүстүлэр, дойдуларын, сирдэрин-уоттарын туһунан олус үчүгэйдик, интэриэһинэйдик кэпсээтилэр. «Селигдарзолото”, “Алданзолото”, “Саха Голд Майнинг” сылдьан, оҕолор көмүс хостооһунун ньыматын, үлэтин-хамнаһын, онно үлэлиир тиэхиньикэлэр тустарынан олус сэргээн иһиттилэр, сөҕө-махтайа көрдүлэр, ыйытыылары биэрдилэр. “Железные дороги Якутии”, локомотив ыстаансыйатын, Алдан устун күүлэйдээһини, кыраайы үөрэтэр мусуойу кэрэхсээтилэр. Ыллымахха Тырынкиннар родовой общиналарыгар ыалдьыттааһыннара бэйэтэ туспа умнуллубат өйдөбүлү хаалларда. Манна икки дьиэ кэргэн 350 табаны хайдах көрөн, иитэн олороллорун, олохторун укулаатын көрдүлэр-иһиттилэр. Алдан куоракка хайыһардьыттары бэлэмниир спортивнай комплекс болҕомтолорун улаханнык тарта. Бу экспедициябыт саҕаланыаҕыттан түмүктэниэр диэри хас киэһэ ахсын күннээҕи айаны-сырыыны ырытыһыы, хардарыта ыйытыылары биэрии, онно хоруйдааһын, санаа үллэстиитэ, араас күрэхтэһиилэр көхтөөхтүк ыытылыннылар. Манна даҕатан эттэххэ, Анна Егоровна билиини-көрүүнү чиҥэтэргэ итинник ньыманы куруук туттар буолан, оҕолор ханна сылдьыбыттарын, тугу көрбүттэрин, истибиттэрин барытын өйдөрүгэр-санааларыгар олус үчүгэйдик хатыыллар. Маны таһынан, биһиги үөрэхпит кыһатын урукку сылларга бүтэрбит выпускниктар оҕолору кытары бэртээхэй көрсүһүүлэри тэрийбиттэрэ улаханнык кэрэхсэннэ.
Түмүктээн эттэххэ, үөрэнээччилэрбитигэр олус туһалаах экспедиция буолла. Бары улаханнык астынан, үөрэн кэллибит. Учууталбытыгар Анна Егоровнаҕа, өйөбүл буолбут төрөппүттэрбитигэр, истиҥ көрсүһүүлэри бэлэхтээбит үөрэхпит кыһатын выпускниктарыгар, көрсүһүүнү олус бэркэ тэрийбит, оҕолор тустарыгар бары кыһамньыларын уурбут алданнарга махталбыт муҥура суох.
Саргылаана Игнатьева бэлиэтээбитинэн, экспедицияларын үлэтэ сылтан сыл сайдан, тупсан, оҕолор билиилэрэ-көрүүлэрэ дириҥээн иһэр. Маныаха үөрэнээччи идэтин таларыгар, эрдэттэн толкуйдууругар бырайыак көмөлөөҕүн тоһоҕолоон этэр.
Биһиги корр., “Саха сирэ” хаһыат, edersaas.ru