Саха сирин Идэлээх сойуустарын федерацията президиум уочарата суох мунньаҕын ыытан, биэнсийэҕэ тахсар сааһы уһатар туһунан сокуон барылын утаралларын биллэрдилэр
Мунньахха Госдума бэрэссэдээтэлигэр, Госдума үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлигэр, дьокутааттарга, Ил Түмэн бэрэссэдээтэлигэр утаралларын туһунан сурук суруйарга быһаардылар.
“Бу биэнсийэ реформата мөлүйүөнүнэн дьон социальнай уонна экэнэмиичэскэй балаһыанньаларын мөлтөтүө, дойдуга дьадайыыны, тэҥэ суох буолууну, долгуйууну таһаарыа. Биэнсийэҕэ тахсар сааһы уһатыах иннинэ дьон доруобуйата, олоҕун усулуобуйата тупсарыгар, олоҕо уһууругар туһуламмыт миэрэлэри ылыллыахтаах этэ. Бу реформа РФ Конституциятын кэһэр. Ордук Уһук Хоту ыарахан усулуобуйаҕа олорор, кылгас олохтоох нэһилиэнньэҕэ куһаҕаннык дьайар. Маннык быһаарыылар В.Путин «О национальных целях и стратегических задачах развития Российской Федерации на период до 2024 года» Ыйааҕар туруорар соруктарыгар сөп түбэспэттэр. Бу боппуруоһу быһаарыах иннинэ, Арассыыйаҕа бүтүн норуот быһаарар референдумун ыытары туруорсабыт”, — диэн суруктарыгар этиллэр.
Көҥүл профсойуустар федерацияларын (ФНПР) бэрэссэдээтэлэ Михаил Шмаков этэринэн, Биэнсийэ пуондатын толорорго хамнаһы үрдэтии (усунуос үрдээһинэ) уонна бизнеһи “күлүктэн” таһаарыы үгүс үбү киллэриэн сөп. Кырдьык, билигин үгүс бизнесменнэр үлэһиттэригэр хамнастарын кэмбиэргэ уган биэрэллэр, онон нолуоктан, усунуостан куоталлар. Шмаков маннык антисоциальнай реформа экэниэмикэҕэ эмиэ охсуулаах буолуохтааҕын туһунан Дмитрий Медведевкэ суруйда.
Саха сирин олохтоохторун www.roi.ru сайтка киирэн, утаралларын биллэрэллэригэр, петицияҕа илии баттыылларыгар ыҥыраллар. Ону тэҥэ www.sakhaprofs.org сайтка киирэн, анал бланканы хачайдаан ылан, толорон баран, СӨ идэлээх сойуустарын федерациятыгар тиэрдиэн сөп. Аадырыстара: Дьокуускай к., Курашов уул., 24, 312 каб. Төл.: 403-170, 403-208.
Ангелина ВАСИЛЬЕВА, “Саха сирэ”, edersaas.ru