Бу өрөбүллэргэ Дьокуускайга Киров уулуссатыгар «Идэһэ» диэн ааттанар ас-үөл дьоҕус дьаарбаҥката буолла.
edersaas.ru
Тоҕо «дьоҕус» диир эбит буоллахха, бастатан туран, дьаарбаҥкаҕа кыттааччы биллэ аҕыйах.
Атыылаһааччы да элбэҕэ суох. Дьон кэпсэтэриттэн иһиттэххэ, сүрүннээн батсаапка «массыына сылдьар буолан, сыана чэпчээтэ» диэн биллэриини ааҕан кэлбиттэр.
Сыана, кырдьык, түһэ сатаабыт. Холобура, убаһа этэ 700 солкуобайтан 400-500 солкуобайга тиийэ аччаабыт.
Балык ас атыыга соччо суох. Арай Булуҥ улууһун «Хоту-Балык» атыылааччылара элбэх балыктаахтара харахха быраҕыллар.
Ааһан иһэн көрдөххө, дьон интэриэһиргииринэн уонна ыларынан, «хоту-балыктар» ыыһаммыт ряпушкалара бэркэ барар эбит.
Хаһаайына биллибэт (хаһаайыстыба аата-суола суох) сыаналаах балыкка соннук ким да чугаһаабата.
Арыы атыыта суоҕун тэҥэ. Анаан арыы ыла кэлбит дьон мэлийэн бардылар. Сураҕа, бу өрөбүллэргэ атыылааччы үксэ «Строительнай» ырыынакка турар үһү. Онон сир аһа эмиэ бу дьаарбаҥкаҕа — мэлигир.
Хаһаайыстыбалартан Хатастан сылдьар «Баҕараҕы» үгүс киһи хайгыы көрбүт буолуохтаах. Сыаната удамырынан, хатастар эттэрин да хото батардылар быһыылаах. 400 cолкуобайга убаһа этин дьон хото атыыласта.
Эт, тыл, быар «Идэһэ» диэн дьаарбаҥка аата да этэринии, дэлэй. Быар сыаната түспэтэх — киилэтэ 2000 солкуобайтан тахса.
Бу икки өрөбүл күнүнээҕи дьаарбаҥкаттан сылыктаатахха, атыылааччыта да, атыылаһааччыта да аҕыйаҕыттан бу нэдиэлэнэн маннык тэрээһин тохтууһу быһыылаах.
Дьиҥэр, тэрийээччилэр дьаарбаҥкаҕа бэрт табыгастаах, чөкө сири булбуттар эбит.
Бары сылаас сири, «Строительнай» ырыынагы талбыттара буолуо даҕаны, бу сыстыганнаах дьаҥ саҕана оптуобуһунан онно тиэстэр кутталлаах. Оттон салгын сии таарыйа Киров уулуссатыгар баар дьаарбаҥкаҕа дьон син сылдьыа эбит да, ас-үөл арааһа биллэ аҕыйах. Эмис эт эрэ кырыы-кырыытынан. Ол эрээри дьон биирдэ тэринэн кэлбиччэ, киһи барытыттан үссэнэн барыан баҕарара чуолкай буоллаҕа.
Арай кэлэр өрөбүлгэ хартыына уларыйара дуу…
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.