Сорох уоруйахтар иччитэх турар биитэр хаһаайыттара быстах кэмҥэ барбыт дьиэлэрин анаан кэтиир идэлээхтэр эбит.
СӨ ИДьМ-тын пресс-сулууспата иһитиннэрбитинэн, Дьааҥы улууһугар 28 саастаах дьахтар дьиэтигэр уоруу тахсыбыт. Ол туһунан кини полиция дьуһуурунай чааһыгар тыллаабыт.
Оперативниктар уорбаланааччыны туппуттар — Дьааҥыттан төрүттээх, урут сууттана сылдьыбыт 24 саастаах киһи эбит.
Барыллаан быһаарыынан, бу эдэр киһи бөһүөлэк кытыытыгар турар дьиэ күлүүһүн алдьатан киирбит. Хаһаайыттара балачча кэм дьиэлэригэр кэлбэтэхтэрин бэркэ диэн билэр буолан.
Ол киирэн, икки суотабай төлөпүөнү, икки жесткай диискэни уонна биир планшеты уоран тахсыбыт. Санаатыгар, бу маллары атыылаан-батаран, харчы оҥостуом диэбит да, тутуллубут.
Бу чахчынан «уоруу» ыстатыйанан холуобунай дьыала тэриллибит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.