Саха сиригэр уһуллубут “Иччи” диэн ааттаах киинэ Испанияҕа ыытыллар аан дойду биир саамай кырдьаҕас «SITGES» киинэ бэстибээлигэр кыттар ылар буолла. Бу бэстибээл быйыл алтынньы 8-18 күннэригэр 53-с төгүлүн тэриллиэҕэ.
«SITGES» киинэ бэстибээлэ бастаан фантастика киинэлэр бэстибээллэрин курдук ананан тэриллибитэ. Кэнники кутталлаах киинэлэр туспа бырагыраама быһыытынан күрэскэ ылыллар буолбуттара. Билигин Каталонияҕа ыытыллар бэстибээл бу жанрдарга саамай аптарытыаттаах, биллиилээх тэрээһин буолар. Аҥардас көннөрү кыттыыга ыҥырыыны тутуу эрэ улахан ситииһинэн ааҕыллар.
Бу бэстибээлгэ кыттан мөлүйүөнүнэн көрөөччү сүрэҕин сүүйбүт киинэлэр сүрэхтэниилэрин ааспыттара. Ол курдук, «Бешеные псы», «Гражданин Икс», «Гаттака», «Звонок», «Видок», «Затоичи», «Олдбой», «Кошмар на улице вязов», «Дракула» курдук киинэлэр «SITGES» иһигэр маҥнайгыларын экрааҥҥа көстүбүттэрэ.
“Иччи” киинэ режиссера Костас Марсаан бу ыҥырыы туһунан маннык кэпсиир:
— «Сатаммат» диэн тылы билиммэт продюсербыт Марианна Скрыбыкина бу бэстибээлгэ кыттарбытыгар улахан үлэни оҥорон ситистэ. Биллэн турар, онно тиийэн кыттар баҕа санаалаахпыт. Ол кэмҥэ аан дойду үрдүнэн харантыыннар тохтооннор, аан дойду искусствотыгар сүдү оруоллаах биир санаалаах дьоммутун кытта көрсөн кэпсэтэн кэлиэхпит диэн эрэнэбин. Арассыыйаттан биһиги хартыынабытын кытта Егор Абраменко “Спутник” диэн киинэтэ кыттыыны ылар.
Бу бэстибээли, фантастика уонна хоррор жанрдраах киинэлэри сөбүлээччи буоларым быһыытынан, уруккаттан кэтээн көрөбүн, кыттар чиэскэ тиксибиппиттэн олус үөрдүм. «Гаттака», “Человек слон”, “Кошмар на улице вязов» курдук олус сөбүлүүр киинэлэрим SITGES бэстибээлгэ маҥнайгыларын көстүбүттэрэ. Онон биһиги “Иччибит” итиннэ кыттара тус бэйэбэр олус долгутуулаах.
Егор Карпов, «Саха сирэ» хаһыат, edersaas.ru