Бэҕэһээ Бүлүү улууһун I Күүлэт нэһилиэгин олохтооҕо Василий Васильев хапкааныгар аарыма бөрө иҥнэн, булчут быйыл кыһын иккис аһыылааҕын өлөрдө.
Хапкаанын нэһилиэктэн баара-суоҕа 5 км ыраах сытар Бэс Бохооной күөлүн аттыгар ииппит. Онон адьырҕа нэһилиэк аттыгар чугас кэлбит эбит. Бу иккис адьырҕаны сэтинньи саҥата бултаабыт.
«Билигин саарбалыы сылдьар буолан, бөрөлөрү Саҥа дьыл кэнниттэн биирдэ сүлүөм. 20-лии тыһ. солк. «Саха-булт» тэрилтэҕэ туттарыам. Билигин нэһилиэк сиригэр-уотугар түөрт бөрө баар. Ону сойуолаһа сылдьабыт. Бү күһүн элбэх сылгыны тартылар. Сүтүктээх киһи элбэх.
Аны туран, соторутааҕыта икки бөрө атын сиртэн чинчийэ диэн кэлэн бардылар. Ол курдук, улахан күөллэри хаба ортолорунан тоҥуу хаары харса суох кэһэн аастылар. Маннык кэлэн барбыт аһыылаахтар халлаан тымныйдаҕына хайаан да төннөөччүлэр», – диэн уопуттаах булчут сэрэхэдийбиттии кэпсээтэ. Биллэн турар, ити адьырҕалар сыспай сиэллээхтэргэ иҥээҥнии сырыттахтара.
«Аарыма бөрө ыйааһына, ортотунан, 70-80 киилэ быһылаах», – диир булчут Василий Васильев.
СӨ Айылҕа харыстабылын министиэристибэтин иһинэн булт-алт ресурсатын харыстааһыҥҥа, бэрээдэктээһиҥҥэ управление салайааччытын солбуйааччы Дмитрий Лугинов:
– Хотугу бөрө (полярнай) үгүс өттүгэр сырдык сиэрэй буолар. Бу бөрөлөр үксүн хоту улуустарга уонна туундара эргимтэтигэр төрүүллэр-ууһууллар. Бүлүү улууһун I Күүлэтигэр бултаммыт адьырҕа хотугу бөрө буолбатах. Дьиҥэр, хотугу бөрө диэн туспа көрүҥ быһыытынан суох.