Экологическай кэтээн көрүү кэмитиэтэ өрөспүүбүлүкэ арҕаа өттүгэр «Алмаастаах хочо» спортивнай-чэбдигирдэр киин диэки «АЛРОСА» хампаанньа кирдээх уутун тохпотоҕун быһаарда. Соторутааҕыта Чернышевскай бөһүөлэк аттыгар айан суолугар уу тохтубутун туһунан иһитиннэрии социальнай ситимнэринэн киэҥник тарҕаммыта. Ону чинчийэн көрөөрү, Мииринэйтэн иниспиэктэрдэр уу тохтубут сиригэр тахса сырыттылар.
edersaas.ru
Айаал Барахов, Экологическай кэтээн көрүү Мииринэйдээҕи кэмитиэтин салайааччытын эбээһинэһин толорооччу: «Whats upp» ситимигэр суруйалларынан, хвостохранилищеҕа минерализованнай уу мустар сирэ баар. Ол суолга уу тохтубут сириттэн хотугулуу-илин диэки. Оттон өрүс сүүрүгэ арҕааттан илин диэки устар, Чуоналыыр өрүс Оччугуй Ботуобуйаҕа түһэр.
Хвостохранилище сүүрүк аллараа 7,5 килэмиэтирдээх сиргэ баар, өскөтүн уу тохтубутун да иһин, ити үөһэ этиллибит сиргэ хайдах да тиийэр кыаҕа суох».
Мииринэй айылҕаны кэтээн көрөр иниспиэктэрдэрэ СӨ Экологиятын министиэристибэтин иһитиннэриитин кытта сөпсөһөн, ону чиҥэтэн биэрдилэр. Биэдэмистибэ салайааччыта этэринэн, минерализованнай уу хайа баазатын диэки арҕаа, таҥнары устар кыаҕа суох. Сабаҕалаан көрүүнэн, Чуоналыыр өрүс тааҥныыр уута суолга киириэн сөп.
Марианна Тыртыкова, «Саха сирэ», edersaas.ru