Бу күннэргэ Национальнай художественнай мусуойга РСФСР үтүөлээх, Саха АССР норуодунай худуоһунньуга, САССР искусствотын үтүөлээх деятелэ, живописец Леонид Александрович Ким төрөөбүтэ 100 сылыгар аналлаах быыстапка аһылынна.
Татьяна Маркова, «Саха сирэ» хаһыат, https://edersaas.ru/
Леонид Ким, аҕа көлүөнэ худуоһунньуктар биир саамай чаҕылхай бэрэстэбиитэллэрэ, бэйэтин айымньыларынан өрөспүүбүлүкэ ойуулуур-дьүһүннүүр искусствотын сайдыытыгар биллэр-көстөр, бөдөҥ кылаатын киллэрсибит талааннаах маастар буолар (“Обмен опытом”, 1950 с; “Первооткрыватели Алдана”, 1960 с; “Самодеятельность”, 1963 с; “С гражданской”, 1964с; “Полдень”, 1966 с; “Солдаты гражданской”, 1977с. о.д.а ). Кини мэтириэт жанрыгар бэрт таһаарыылаахтык үлэлээбитэ.
Быыстапканы 2017 сыл тохсунньу 29 күнүгэр диэри (Киров уул., 9) кэлэн көрүөххэ сөп, диэн мусуой үлэһиттэрэ иһитиннэрэллэр.
Леонид Ким отучча сыл устата (1945-1974) Дьокуускайдааҕы художественнай училище преподавателинэн, дириэктэринэн үлэлээбитэ. Онон, Леонид Александрович мындыр салалтатынан ойуулуур-дьүһүннүүр искусствоҕа бүтүн көлүөнэ саха маастардара иитиллэн тахсыбыттара. Оттон Дьокуускай куораттааҕы оҕо художественнай оскуолатын эмиэ кини төрүттээбитэ, бастакы дириэктэрэ этэ.
Үөрэнээччилэр уобарас арыйаллар
Леонид Ким аатын сүгэр Дьокуускай куораттааҕы оҕо художественнай оскуолата быйыл 45 сааһын туолла. Манна 250-ча оҕо үөрэнэр. Оскуола дириэктэринэн Николай Анатольевич Птицын үлэлиир. Педагогтар бу бэлиэ даатанан уонна Леонид Александрович Ким төрөөбүтэ 100 сылынан, үөрэнээччилэригэр “Худуоһунньук мэтириэтэ” диэн куонкурус-быыстапканы биллэрдилэр.
Галина Маркова, Л.А.Ким аатынан Оҕо художественнай оскуолатын завуһа:
— Сылы түмүктүүр уонна сыл аҥардаах үөрэх дьылын түмүктэрин таһаарыы курдук, төһө даҕаны түбүктээх күннэр турдаллар, куонкурус-быыстапкаҕа элбэх – уопсайа 72 үөрэнээччи бэйэтин баҕа өттүнэн кыттыбыта биһигини үөрдэр. Оҕолорго “Худуоһунньук мэтириэтэ” тиэмэҕэ Леонид Ким – бу айылҕаттан талааннаах Учуутал уобараһын арыйан көрдөрөр, кини оҕо эрдээҕитин, биитэр Худуоһунньук туһунан хомуур уобараһы айар сорук туруоруллубута. Биһиги көрүүбүтүнэн, бэрт интэриэһинэй үлэлэр бааллар. Түмүк уһун өрөбүл кэнниттэн тахсыаҕа, онон кыайыылаахтар ааттарын тохсунньуга билиэхпит.
Татьяна Маркова.