Худуоһунньук Кыыдаана Игнатьева искусство оскуолатын арыйда
Дьокуускайга Киров уулуссатыгар турар дьиэ истиэнэлэрин бүтүннүү уруһуйдаабыт худуоһунньук Кыыдаана Игнатьева искусство оскуолатын арыйда. Кыыдаана манна араас маастар-кылаастары ыытар былааннаах. Худуоһунньук «Эдэр сааска» маннык кэпсээтэ:
— Бэйэм студиябын арыйар санаа тута кэлбэтэҕэ. Бастаан бэйэбин сайыннардым, искусство араас көрүҥнэрин үөрэттим, бэлэм буоллум дии саныыбын. Онон студиям бэйэтин кэмигэр арылынна. «Якутпроект» дьиэтигэр (Аммосов уул. 8) үлэлээн эрэбин. Урут манна бэйэм генпланист-архитекторынан үлэлээбитим. «Якутпроект» дириэктэрэ өйөөн, биир хоһу куортамҥа биэрэргэ сөбүлэспитэ. Эдьиийбин кытта биир ый иһинэн оҥорон бүтэрдибит. Батареяларын, миэбэлин, истиэнэлэрин кырааскалаатыбыт, бэйэм истиэнэтин уруһуйдаатым. Бүгүн бастакы маастар-кылааспын ыытабын. Киистэлэрин, уруһуйдуур матырыйаалларын барытын бэйэм биэрэбин, барыта саҥа. Киһи сылдьар, үлэлиир сирэ настарыанньатыгар, уопсайынан, олоҕор улаханнык дьайар. Онон студиябын тупсаҕай, киһи кута-сүрэх тохтуур гына кыһаллан оҥордум.
— Билигин живопись, уруһуй, дизайн хайысхаларынан маастар-кылаастары ыытабыт. Салгыы куурустары бэлэмниир былааннаахпын. Мин санаабар, хас биирдии киһи уруһуйдуур кыахтаах, үөрэниэн уонна баҕалаах буолуон наада.
