Маны аах Уопсастыба

Huawei табаара атыыга тоҕо суоҕуй?

Арассыыйаҕа Huawei хампаанньа төлөпүөннэрэ аны атыыламматтар үһү диэн сурах кэллэ. Суотабай төлөпүөҥҥэ  «Самсунгтан”  атыны төһө да билиммэтэрбин, Кытай аатырбыт Huawei хампаанньата оҥорон таһаарар төлөпүөнэ Дьокуускайга баарын-суоҕун, ону сэргэ сыана төһө үрдээбитин билсээри, маҕаһыыннары кэрийдим.

Куораппыт киин уулуссатыгар икки сэргэстэһэ турар «Телмарт” уонна “Мобидик” маҕаһыыннарга тиийдим. Арай киирбитим, аахсыйа буола турар. Уу  харчынан атыылаһар дьоҥҥо төлөпүөн сыаната 800 солкуобай  курдугунан чэпчэки эбит. Аны туран, урукку сыанатыттан иккилии тыһыынча чэпчээбит диэн суруллубут. Сиэннэригэр төлөпүөн атыылаһаары тала сатыы турар аҕам саастаах дьоҥҥо атыыһыт уол холкутук быһаарар. Оҕо төлөпүөҥҥэ төһө оонньуурун ыйытар. Ити кэпсэтиигэ аны мин көх-нэм буолан кыттыстым. Атыыга Huawei төлөпүөн баар дуо диэн сурастым. Онуоха: «Суох, биһиги гугл сервис суоҕунан сибээстээн, Huawei фирма төлөпүөнүн атыылаабат буоллубут”, — диэтэ.

Салгыы «Мобидик» маҕаһыыҥҥа таҕыстым. Манна атыылаһааччы  суоҕун тэҥэ. Киирээппин кытта, туохха наадыйарбын сурастылар. Санаа курдук Huawei баар дуо диибин. Онуоха кулун тутартан ити төлөпүөн кинилэргэ атыыламмат буолбутун эттилэр.
Оттон төлөпүөн сыанатын туһунан этэр буоллахха, сыана улаханнык  ыараабатах. Хата, икки көрбүт маҕаһыыннарбар чэпчэтиилэр буола тураллар.
Бэлиэтээн эттэххэ, Huawei төлөпүөҥҥэ улахан наадыйыы суоҕунан бу хампаанньа оҥорор төлөпүөнэ аны Арассыйаҕа атыыламмат буолуон сөп диэн сабаҕалаатым.

 

Ульяна ЗАХАРОВА. Ааптар хаартыскаҕа түһэриилэрэ.

1
0
Telegram Whatsapp