Бүгүн, муус устар 8 күнүгэр, саха норуодунай артыыһа, ырыа айааччы, көмүс куоластаах ырыаһыт Христофор Максимов төрөөбүтэ 103 сылын туолла.
edersaas.ru
Норуот таптаан истэр ырыаһытын үтүө аата, ырыалара күн бүгүҥҥэ диэри дьон-сэргэ өйүттэн-санаатыттан сүппэттэр. Христофор Трофимович аатынан араас куонкурустар, бэстибээллэр тэриллэллэр, хоһооннор хоһуллаллар, ырыалар ылланаллар.
Оттон бу Амма улууһуттан төрүттээх, дьон биһирэбилин ылбыт, элбэх куонкурус кыайыылааҕа худуоһунньук Николай Рязанскай оҕо сааһын илдьитин — таптыыр ырыаһытын уруһуйдаан үйэтиппитин билэбит. Сэрэйдэххэ, худуоһунньук биир дойдулааҕын ыраахтан эҥсиллэр куолаһа кини кулгааҕар умнуллубаттыы иҥэн хааллаҕа. Ол да иһин, маннык дьикти уруһуйдар күн сирин көрдөхтөрө.
Худуоһунньук Христофор Максимов ырыаларын дьоруойдарын Харалаампый молоочугу, Өндүрүүскэ тиэтэйбэти, Хаппытыаны, Дьарааһыны, Үөдэгэй киһитэ Микииппэри ойуулаабыта кэрэхсэбиллээҕин.
Надежда ЕГОРОВА, “Саха сирэ”, edersaas.ru