Хотугу улуустарга таһаҕаһы таһыыга РФ тутуутун министиэристибэтэ көмө ыытыаҕа
ОДьКХ хотугу улуустарга таһаҕаһы таһыытыгар РФ тутуутун министиэристибэтиттэн көмөнү ылыаҕа. Бу туһунан СӨ бырабыыталыстыбатын бастакы вице-премьерэ Дмитрий Садовников РФ тутуутун уонна коммунальнай хаһаайыстыбатын миниистирин солбуйааччы Алексей Ереськоны кытары көрсүһүүтүн кэнниттэн иһитиннэрдэ.
Дмитрий Дмитриевич бэлиэтээбитинэн, билигин министиэристибэҕэ эрэгийиэннэр оттугу атыылаһыыларыгар көрсүбүт эбии ороскуоттарын сабыы боппуруоһа көрүллэ турар. Бу көмө дотация быһыытынан бэриллиэҕэ. Санатан эттэххэ, билигин ньиэп сыаната 60 %, таас чох 47 % үрдээн турар.
– Бу маннык механизм 2018 сыллаахха энергетикаҕа эмискэ сыана үрдээһинин кэмигэр эмиэ туһанылла сылдьыбыта. Ол эрээри оччолорго ньиэп хочуолунайга туһаныллар оттук быһыытынан киирбэккэ хаалан, өрөспүүбүлүкэ ити сыл 2 млрд солкуобайын сүтэрбитэ. Саха сирин усулуобуйатынан мазут туттуллубат, онон билигин министиэристибэ ньиэби оттук испииһэгэр киллэттэрэргэ туруорсуоҕа, – диэн иһитиннэрэр Дмитрий Садовников.
Маны таһынан бастакы вице-премьер бааннар сүрүн ыстаапкаларын үрдэппиттэринэн чэпчэтилээх кирэдьиити биэрии боппуруоһун көтөхтө, миниистири солбуйааччы Юрий Гордеевы кытары көрсөн, “Олорор дьиэ уонна куорат эйгэтэ” национальнай бырайыагынан “Ыраас уу” бырагырааманан киириэхтээх эбийиэктэр тустарынан кэпсэттэ.
Аграфена КУЗЬМИНА