Арктика, хотугу улуустарга бу нэдиэлэҕэ былааннаммыт социальнай суолталаах ас-үөл, табаар барыта тиийиэҕэ. Бу туһунан бүгүн СӨ бырабыыталыстыбатын бэрэссэдээтэлин солбуйааччы Михаил Никифоров брифинг кэмигэр иһитиннэрдэ.
Бу улуустарга барыта холбоон 4950 туонна таһаҕас былааннаммытыттан миэстэтигэр 5400 туонна социальнай суолталаах бородуукта, табаар тиийиэҕэ. Михаил Викторович иһитиннэрбитинэн, өрөспүүбүлүкэ билигин 50-59 күҥҥэ аһыыр аһылыгынан толору хааччыллан олорор. Социальнай суолталаах табаардар барыта атыыга бааллар.
Сыана бэлиитикэтигэр судаарыстыбаннай кэмитиэт дааннайынан, кэлиҥҥи үс күҥҥэ социальнай суолталаах 16 табаарга сыана 3 % үрдээбитэ бэлиэтэммит. Ол курдук, ынах этэ, саахар, чэй, сиир арыы, о.д.а. үрдээбиттэр. Ол оннугар сибиинньэ, куурусса этэ, балык, гречка, виноград сыаналара 2 % түспүт.
Санатан эттэххэ, билигин өрөспүүбүлүкэ үрдүнэн туһааннаах кэмитиэт уонна Борокуратуура сыана тахсыытын кыраҕытык кэтииллэр, хонтуруолга тута сылдьаллар.
Аграфена КУЗЬМИНА